بالعربي المشربح ..بهمش ياإخوان , تحملوني شويه ..

29/05/2008

والله يا جماعه الخير ما انا قادر الاقى حِجه مٌقنعه لكل هالمعركه على الحكومه وعلى مشاركه فتح فيها ....

يعني مؤتمر الحركه ضل عليه حوالى سته شهور على الأكثر , معقول انه الجماعه المستقتلين على وزاره بدهم يقنعونا أنهم في ست شهور قادرين ينجزوا معجزات إذا أخذوا وزاره ؟؟؟

طيب ما هي اي وزاره بدها على الأقل ثلاث او اربع شهور قبل ما تستطيع تستوعب وزير جديد ,

وبعدين شهر او إثنين مشان تفهم خطته للعمل وتبدا في تنفيذها ....

اخونا عبدالله الإفرنجي بيقول انه ضروري نكون في الحكومه مشان نسجل لحالنا إنجازات قبل الإنتخابات ...

يا سلام على هالمنطق ...

هوه فتح ما بتقدر تسجل إنجازات إلا من خلال الوزارات والمشاركه بالحكومه او حتى قيادتها ؟؟؟

طيب ما هي التجربه أثبتت انه شعبيه فتح , بتكبر كل ما حملت على ظهرها مسؤوليه تنظيم مواجهه الإحتلال ,

ليش إذاً الجماعه المستقتلين على وزارات ما بيحطوا جهدهم في تنظيم وضع إمكانيات الحركه كلها في هالمواجهه ...

ومش بالضروري عسكريا ,

طيب ما هو في اكثر من مليون مجال مواجهه جماهيريه مع الإحتلال,

وإحنا مش مستعملين ولا حتى عشره بالميه منها ...

يعني لو بكره , مثلا , توجه مِيه وخمسين شاب فتحاوي ,حاملين كريكات وكزمات ,لأول حاجز إسرائيلي ,

وهدوه ,

مش ممكن مثل هالعمل بيفيد الحركه وشعبيتها اكثر بعشرين مره من اتخن وزاره ؟؟؟...

واحد ثاني , من اخوتنا الموقرين في مجلسنا الثوري بيقول انه الدكتور فياض بيحاصر كوادر الحركه في السلطه ,

يعني إذا كان في ألنا وزراء , رايحين يحافظوا على كوادر الحركه في السلطه ,

والله ما أنا فهمان شو اللى بدهم إياه الأخوه ,

همه بدهم مؤسسات سلطه حديثه مٌستقله حضاريه ,زي العالم والناس ,فيها موظفين مهنيين قادرين على خدمه الناس , وملتزمين بمهام وظيفتهم ,

ولا بدهم سلطه ملجاء ل’’مناضلين ’’ ما ألهمش عمل , بنوظفهم مشان يعبوا فراغ ...

من إيمتى كانت الوظيفه في السلطه هي الحل لمشكلات كادر الحركه المعيشيه ؟؟؟

طيب مش من الأفضل انه الحركه ومجلسها الثورى الموقر , تحط برنامج فتحاوي خاص للكوادر الفتحاويه , وتقوي إستقلالهم المادي , عبر دعمهم في عمل نضالي مٌنتج , وفي بعض المشاريع الإقتصاديه المستقله الفعاله , وفي مؤسسات ثقافيه وإجتماعيه , وخدماتيه إجتماعيه , وفي خدمه التنظيم , ومليون طريقه ثانيه بتأدي لإستقلاليه الحركه عن السلطه , وبنفس الوقت بتحفظ السلطه بعيده عن التنافس الوظيفي الفصائلي ؟؟؟

كيف بدهم إخواننا الموقرين في المجلس الثوري , بكره , يقولوا لحماس وغيرها , إنه السلطه مش ملجاء لكوادرهم , إذا إحنا اليوم حولناها لملجاء لكوادرنا ؟؟؟

راح يجاوبونا ...

هو في حدا أحسن من حدا ؟؟؟

ليش انتوا بتغرقوا السلطه بكوادركم , وإحنا ممنوع علينا ؟؟؟

***

يا جماعه الخير تطّلعوا عل الأخبار مبارح على النت ....

*خطه إسرائيليه لبلع القدس ...

*الآف الفلسطينيه مهددين بالتشرديد , لإنه الإحتلال من الممكن يهدم اكثر من *ثلاثه آلاف بنايه فلسطينيه في اللي بسموه منطقه ج ...

*من اول السنه لحد اليوم الإحتلال إختطف لكثر من 2700 فلسطيني , وصار عدد اهلنا في سجونهم اكثر من 11700 بني آدم ,والحبل على الجرار ...

*اقتحام قلقيليه وجنين ...

*باراك بيقول بيننا وبين الفلسطينيين المعركه راح تكون دايمه ...

*الجربا ليفني بتقول انه مادام الفلسطينيه بحكوا عن النكبه ما راح يكون لهم دوله ...وممثلها في الامم المتحده بنتقد وبوقاحه الامم المتحده لإنها إستعملت مصطلح النكبه ...

*ثلاث اطفال رٌضَع ماتوا مبارح واول مبارح لإنه ما فيش جرعه دوا في غزه , وصار عدد المساكين اللى راحوا هيك ,مشان حبه اسبرين167 بني آدم ...

*الكنيست بناقش مشروع قرار عنصري جديد ضد اهلنا في ارض الثمانيه واربعين ...

وبعد كل هالأخبار ,بتيجي اخبار مجلسنا الثوري الموقر ...

*تشكلت لجنه مصالحه فتحاويه فتحاويه ... ما شاء الله صار بدنا واصته مشان نتصالح ..وبكره بركه بنطاب تدخل الامم المتحده ...

*عزام الاحمد بيشن هجوم على حكومه فياض ...اخونا نصر يوسف كمان ...ومعهم عبدالله الإفرنجي ...فرجه زمان , صرنا يا اخوان ....

كل الناس مشغوله ,إما بأكل وهضم حقوقنا ,او بالدفاع عنها , وإحنا مجلسنا الثوري , ما شاء الله بيباطح مشان وزارات ...

هاي الصوره المنقوله ...

بيجوز مش صحيحه ميه بالميه ...

بس , هاذا هو اللى راح يعلق في مخ الناس ...

مش يعنى ’’جريمه ’’ بحق فتح , مثل هالصوره العوجا؟؟؟ ....

مش يعني , خدمه مجانيه بنقدمها لكل اعدائنا ؟؟؟ ....

وبعدين , كل ديباجات البيانات الختاميه , وكلماتها الطنانه والرنانه , ما بتغيير إشي بالصوره البشعه اللى علقت في مخ الناس ...

معقول انه ما في حدا من جماعتنا واعي لهالحكايه ؟؟؟

وألآ انا المجنون ؟؟؟؟

***

ياجماعه الخير يا ناس يا بشر فتح قدامها مؤتمر مصيري جاي ...

قضيتنا على كف عفريت ...

كل ’’محادثات السلام ’’ اللى عليها بنينا إستراجيتنا , بكره راح تنهار , يوم ما راح يوخذوا اولمرت للسجن ...

اللعبه واضحه ..

كل مره بلعبوها معانا ...

ارض الضفه بتذوب كل يوم شويه ...

واهل القدس , الله يساعدهم , وضعهم مش احسن ...

فى ارض الثمانيه واربعين , اهلنا بيصارعوا الصهيونيه مثل الأسود , وبيواجهوا عنصريه فاشيه ...

اهلنا في غزه بيموتوا من الجوع ...

والحصار خانقهم ...

’’أسرائيل ’’ بتفاوض حماس ...

وأوربا بتفتح خطوط معها ...

والعرب ممكن يضغطوا علينا مشان نعود لحوار ’’بدون شروط ’’ , يعني نبلع ’’ الإنقلاب ’’ ونعترف بالأمر الواقع ...

وبوش صب ميه بارده على قفا كل مين أعتمد عليه ....

وأحنا بنركض ورا وزارات ؟؟؟...

وبنحارب الناس اللى همه في النهايه في صفنا , وفي الصف الوطني؟؟؟ ...

***

بعدين معاكم يا جماعه ....

بالله عليكم ,ما فيه عندكم شغله أهم تبلشوا فيها ....

مش الأفضل والأشرف إلكم كلكم تحطوا إيديكم مع بعض مشان تنجّجوا مؤتمر الحركه ؟؟؟

كلّهٌم ست أشهر اللي ضلوا ...

الله بيعينكم تصبروا ...

وبعدين , يا سيدي , خذوا الوزارات اللي بدكم إياها ....

وإلا , بعضكم خايفين ما يطلعهم حصه في المؤتمر ...

وتروح عليهم فرصه استوزار تاريخيه ؟؟؟؟

***

القلب محروق ...

والعقل بده يتفجر ...

والحلق ناشف ....

بهمش يا اخوه , تحملوني شويه ...

ما انا إلا فتحاوي بسيط ...

وما بفهم إلا على قدر عقلي ...