كان يا مكان في قديم الزمان ..

كتبت هذا التعليق في 8/07/07

ياجماعه الخير ..
مساكم ,رب العباد بالخير..
كلنا ..حبيناها ,متنا فيها والها ..واكيد مستعدين نعطيها نور العينين ..والولد والوالدين ..
وحياتنا كمان بعدين .
ليش لأ ؟؟ مش هيه الطريق للوطن ,ولاولى القبلتين؟؟
مين منا ما ترك مشانها ,احيانا ,الشغل والعيله والولد؟؟
ليش لأ,؟؟مش هيه الطريق للحريه والاستقلال والوطن ,والبلد؟؟؟
....
بعدين ..مع الزمن..كل واحد شاف فيها ..اللي بده اياه ..
ليش لأ ,؟؟مش هيه طريق العز والحريه ..واحسن امنياه؟؟
....
بعدين ..مر الزمن ,وتراكمت المأسي والمحن....
صار واحد يشوفها بس علمانيه..
والثاني ,بيقول لأ ..فتح اسلاميه..
واخونا ,احول العينين ..صار فيها يشوف شيوعيه..
حتى انا ..صحت مثل الطرشان ..لأ ياجماعه الخير ..
فتح؟؟ وطنيه,شعبيه,ثوريه.
....
واحد قال..
- يا عالم ياناس,يا شعب ,يا نيام
فتح؟؟
هيه ابو مازن ,مش هوه بيضل قائدنا العام ؟؟
الثاني صاح..
- لأ يا خوي ,
فتح؟؟
ابو فادي ,مش هوه ,كمان ,كان بده ,بالعشره بلدي,والدقه ونص ,وكمان بالصاع صاعين ,يبعد عنا كيد الاعادي؟؟
- شو هالحكي ياناس ؟؟ ما ضل فيكوا احساس؟؟
فتح ؟؟
ابو العلاء.
_فشر ..
فتح؟؟
ابو الطف .
اجا البهلوان ,مثل الحيه, بيجوز مشان يزاود كمان شويه , وصاح..
_ شو هالجعجعه ياولاد؟؟ فضحتونا بين العباد ..الشغله ما بدها اجتهاد ,يا للعار ..
فتح؟؟
هيه بس, شهيدنا ابو عمار.
....
وشويه شوي ,تفرق الاخوان ,اللي اجوا من نفس البطن ,ومن بين نفس الضلعان ..
وبين شد وجذب ,رايحين نقتل حبيبتنا ,فتح,ونقطع وصالها,ونعمل فيها اكثر من اللي كان..
....
يا جماعه الخير ..ياحبابي واخوانيي..
فتح ..كانت ولسه كمان ..
مبادئ واهداف واسلوب ..وكمان نظريه ثوريه.
خلينا نرجع الها ..ونشوفها ..
بركه هيك ,اليوم قبل بكره ,بنتفق على الفكره ..
وبنرج زي زمان ,متفقين ,موحدين,زي كل الاحبه والاخوان ,
وبنرجع لفتح ..عزها ,ومجدها كمان..
غير هيك ..والله ياخلان ,بكره, رايحين كلنا نقول ..
كان ياما كان ..في قديم الزمان.

إلهي ما اجمل هاصوره !!!

23/06/2007

شو سهل نتطلع كل يوم الصبح بالمرايه,

ونتعجب من اللي منشوفه,

ونمجد الصوره ,

ونقول ..

احنا التاريخ كله , الماضي والحاضر والمستقبل.

احنا الثوره والمقاومه .

احنا الديبلوماسيه الهاديه ,والصاخبه.

احنا الشهداء ,ومشاريعها.

احنا الوطن والشعب.

احنا العبقريه والذكا والحنكه.

احنا الكل بالكل.

سبحانه عز وجل ....

ما اروعنا .

شو سهل يا جماعه الخير ,نستعمل الماكياج,

ونخبي الشقوف الصغيره اللي انحفرت مع الزمن ,

وانا نلاقي الحجج والمبررات لحالنا ,

مشان ما نشوف التجاعيد اللي بتشوه صورتنا ,

واننا نتطلع علي بقى النا من رموش العين ,

مشان ما نشفش الدمامل المليانه عمل مصدي ,اللي تبعثرت في الصوره

.شو سهل اننا نكابر ليل نهار ,

ليش لأ ,

ما احنا افضل عباد الله,

ونرفض وبعجرفه , نعترف انه الزمن ومراض الماضي وكل لسعات الحشرات اللي قرصتنا ,

قديش شوهت صورتنا ,

وخلفت وراها اثار بشعه في الصوره.

شو سهل علينا ,يا جماعه الخير ,ا

ننا نصد عنا ونرد حبايبنا وصحابنا ,

اذا استرجوا يوم ينبهونا للي بصير فينا ,

وشو سهل اننا نقنع حالنا انهم غيرانيين ,

متأمرين,

اعداء مخفيين ,

ما بفهموا شي ,

كيف لأ ,

مش احنا افضل واطهر واشرف واحلى خلق الله؟؟

ولما بنبعد عن المرايه ,

بنرسم على وجوهنا ضحكه المبسوط من حاله ,

المتأكد من صحه نظره ودقته وصوابه ,

وبنقعد ,منسكر على حالنا باب قلعتنا ,

وبنتمتم ....

يارب حمدك ورضاك على هالخلقه ,

احنا الكمال والجمال ,

سبحانك ياخالقنا احسن من كل الناس .......

يا جماعه الخير ..

يا حبابي ..

كل مرض اله علاج ,

والشغله والله ما بدها مكياج.

خلينا بس نعترف اننا بشر ,

وانه الظروف والزمن والمرض والاهمال ,

بتترك اثارها ,

حتى في الحجر.

خلينا نوقف شويه

,نجمع مؤتمرنا السادس ,

وليش لأ ,مجلسنا الوطني,

مش همه لسه قشطه القشطه ,

وجه البكسه ,

واحسن من احسن واحد فينا؟؟

خلينا نسألهم ...

يا اهل الخير والحنكه والمعرفه ,

يا كبار العيله والشعب.....

كيف كنا ؟؟؟

وشو صرنا ؟؟

منين جايين ؟؟

ولوين رايحين؟؟.....

بجوز يعني نكون شويه صغيره مغرورين .

وحتى كمان شويه غلطانين.

ضليت طول حياتي أتسائل ...

16/06/2007

يا أخوان

بكفي نضل نضحك على حالنا وعلى الناس,

والقائد الملهم والعبقري

وكل هالنوع منالحكي.

فيش حدا ملهم ,

ولا حدا عبقري..

بعد ابو عمار.

في اداره امريكيه بتخطط وبتنفذ لمصلحه اسرائيل وبس.

وبضحكوا على كل طرف فلسطيني على جنب,

لحماس وعدوها غزه ووقعوها في الفخ ,

وبكره بدمروا غزه عللي فيها ,

واحنا بنصفق وكأنه غزه مش فلسطين.

وعدوا ابو مازن ,

سحب شويه حواجز ,

وترجيع المصاري اللي عند اسرائيل ,

وشويه سلاح وتدريب ,

وترجيع المساعدات الغربيه.

كله مشان شو؟؟

مشان ...

ينزل الدم الفلسطيني زي الشلال

نضعف كفلسطينيه ,

ويضعف ابو مازن..

وبعدين ...

يجبروه (هوه او غيره ,مش مهم بالنسبه الهم),

يوقع بأسم الشرعيه الفلسطينيه على اللي كان الختيار رفض احسن منه ,

ودفع حياته من شانه.

اصحوا ياجماعه ..

هدف اللعبه ,

فلسطين ,

والتنازل عن شويه الحقوق اللي لسه متمسكين لليوم فيها.

ولا ,ليش يعني فتح مش موحده ,

ومش قادره تعمل مؤتمر؟؟

ليش يعني حطوا منظمه التحرير بالثلاجه؟؟

ليش يعني مش راضيين يخلوا حدا من يشاركهم في القرار, ولا حتى ابو اللطف؟؟

اصحوا يا حبابي ..

قبل ما نوكل ايدينا ..

ندم..

ضلييت طول حياتي اسأل حالي كيف قبل ابوي وجدي انه الصهاينه يوخدوا منه بيته في طبريا ...

اليوم فهمت..

وياخوفي بكره ,

ولادكم وولادنا ,

يسألوا حالهم ,

كيف احنا رضينا تطير منا اللي ضل النا من ارض وحقوق.

الله يكون بعونا كلنا.

بالعربي المشربح ..بهمش ياإخوان , تحملوني شويه ..

29/05/2008

والله يا جماعه الخير ما انا قادر الاقى حِجه مٌقنعه لكل هالمعركه على الحكومه وعلى مشاركه فتح فيها ....

يعني مؤتمر الحركه ضل عليه حوالى سته شهور على الأكثر , معقول انه الجماعه المستقتلين على وزاره بدهم يقنعونا أنهم في ست شهور قادرين ينجزوا معجزات إذا أخذوا وزاره ؟؟؟

طيب ما هي اي وزاره بدها على الأقل ثلاث او اربع شهور قبل ما تستطيع تستوعب وزير جديد ,

وبعدين شهر او إثنين مشان تفهم خطته للعمل وتبدا في تنفيذها ....

اخونا عبدالله الإفرنجي بيقول انه ضروري نكون في الحكومه مشان نسجل لحالنا إنجازات قبل الإنتخابات ...

يا سلام على هالمنطق ...

هوه فتح ما بتقدر تسجل إنجازات إلا من خلال الوزارات والمشاركه بالحكومه او حتى قيادتها ؟؟؟

طيب ما هي التجربه أثبتت انه شعبيه فتح , بتكبر كل ما حملت على ظهرها مسؤوليه تنظيم مواجهه الإحتلال ,

ليش إذاً الجماعه المستقتلين على وزارات ما بيحطوا جهدهم في تنظيم وضع إمكانيات الحركه كلها في هالمواجهه ...

ومش بالضروري عسكريا ,

طيب ما هو في اكثر من مليون مجال مواجهه جماهيريه مع الإحتلال,

وإحنا مش مستعملين ولا حتى عشره بالميه منها ...

يعني لو بكره , مثلا , توجه مِيه وخمسين شاب فتحاوي ,حاملين كريكات وكزمات ,لأول حاجز إسرائيلي ,

وهدوه ,

مش ممكن مثل هالعمل بيفيد الحركه وشعبيتها اكثر بعشرين مره من اتخن وزاره ؟؟؟...

واحد ثاني , من اخوتنا الموقرين في مجلسنا الثوري بيقول انه الدكتور فياض بيحاصر كوادر الحركه في السلطه ,

يعني إذا كان في ألنا وزراء , رايحين يحافظوا على كوادر الحركه في السلطه ,

والله ما أنا فهمان شو اللى بدهم إياه الأخوه ,

همه بدهم مؤسسات سلطه حديثه مٌستقله حضاريه ,زي العالم والناس ,فيها موظفين مهنيين قادرين على خدمه الناس , وملتزمين بمهام وظيفتهم ,

ولا بدهم سلطه ملجاء ل’’مناضلين ’’ ما ألهمش عمل , بنوظفهم مشان يعبوا فراغ ...

من إيمتى كانت الوظيفه في السلطه هي الحل لمشكلات كادر الحركه المعيشيه ؟؟؟

طيب مش من الأفضل انه الحركه ومجلسها الثورى الموقر , تحط برنامج فتحاوي خاص للكوادر الفتحاويه , وتقوي إستقلالهم المادي , عبر دعمهم في عمل نضالي مٌنتج , وفي بعض المشاريع الإقتصاديه المستقله الفعاله , وفي مؤسسات ثقافيه وإجتماعيه , وخدماتيه إجتماعيه , وفي خدمه التنظيم , ومليون طريقه ثانيه بتأدي لإستقلاليه الحركه عن السلطه , وبنفس الوقت بتحفظ السلطه بعيده عن التنافس الوظيفي الفصائلي ؟؟؟

كيف بدهم إخواننا الموقرين في المجلس الثوري , بكره , يقولوا لحماس وغيرها , إنه السلطه مش ملجاء لكوادرهم , إذا إحنا اليوم حولناها لملجاء لكوادرنا ؟؟؟

راح يجاوبونا ...

هو في حدا أحسن من حدا ؟؟؟

ليش انتوا بتغرقوا السلطه بكوادركم , وإحنا ممنوع علينا ؟؟؟

***

يا جماعه الخير تطّلعوا عل الأخبار مبارح على النت ....

*خطه إسرائيليه لبلع القدس ...

*الآف الفلسطينيه مهددين بالتشرديد , لإنه الإحتلال من الممكن يهدم اكثر من *ثلاثه آلاف بنايه فلسطينيه في اللي بسموه منطقه ج ...

*من اول السنه لحد اليوم الإحتلال إختطف لكثر من 2700 فلسطيني , وصار عدد اهلنا في سجونهم اكثر من 11700 بني آدم ,والحبل على الجرار ...

*اقتحام قلقيليه وجنين ...

*باراك بيقول بيننا وبين الفلسطينيين المعركه راح تكون دايمه ...

*الجربا ليفني بتقول انه مادام الفلسطينيه بحكوا عن النكبه ما راح يكون لهم دوله ...وممثلها في الامم المتحده بنتقد وبوقاحه الامم المتحده لإنها إستعملت مصطلح النكبه ...

*ثلاث اطفال رٌضَع ماتوا مبارح واول مبارح لإنه ما فيش جرعه دوا في غزه , وصار عدد المساكين اللى راحوا هيك ,مشان حبه اسبرين167 بني آدم ...

*الكنيست بناقش مشروع قرار عنصري جديد ضد اهلنا في ارض الثمانيه واربعين ...

وبعد كل هالأخبار ,بتيجي اخبار مجلسنا الثوري الموقر ...

*تشكلت لجنه مصالحه فتحاويه فتحاويه ... ما شاء الله صار بدنا واصته مشان نتصالح ..وبكره بركه بنطاب تدخل الامم المتحده ...

*عزام الاحمد بيشن هجوم على حكومه فياض ...اخونا نصر يوسف كمان ...ومعهم عبدالله الإفرنجي ...فرجه زمان , صرنا يا اخوان ....

كل الناس مشغوله ,إما بأكل وهضم حقوقنا ,او بالدفاع عنها , وإحنا مجلسنا الثوري , ما شاء الله بيباطح مشان وزارات ...

هاي الصوره المنقوله ...

بيجوز مش صحيحه ميه بالميه ...

بس , هاذا هو اللى راح يعلق في مخ الناس ...

مش يعنى ’’جريمه ’’ بحق فتح , مثل هالصوره العوجا؟؟؟ ....

مش يعني , خدمه مجانيه بنقدمها لكل اعدائنا ؟؟؟ ....

وبعدين , كل ديباجات البيانات الختاميه , وكلماتها الطنانه والرنانه , ما بتغيير إشي بالصوره البشعه اللى علقت في مخ الناس ...

معقول انه ما في حدا من جماعتنا واعي لهالحكايه ؟؟؟

وألآ انا المجنون ؟؟؟؟

***

ياجماعه الخير يا ناس يا بشر فتح قدامها مؤتمر مصيري جاي ...

قضيتنا على كف عفريت ...

كل ’’محادثات السلام ’’ اللى عليها بنينا إستراجيتنا , بكره راح تنهار , يوم ما راح يوخذوا اولمرت للسجن ...

اللعبه واضحه ..

كل مره بلعبوها معانا ...

ارض الضفه بتذوب كل يوم شويه ...

واهل القدس , الله يساعدهم , وضعهم مش احسن ...

فى ارض الثمانيه واربعين , اهلنا بيصارعوا الصهيونيه مثل الأسود , وبيواجهوا عنصريه فاشيه ...

اهلنا في غزه بيموتوا من الجوع ...

والحصار خانقهم ...

’’أسرائيل ’’ بتفاوض حماس ...

وأوربا بتفتح خطوط معها ...

والعرب ممكن يضغطوا علينا مشان نعود لحوار ’’بدون شروط ’’ , يعني نبلع ’’ الإنقلاب ’’ ونعترف بالأمر الواقع ...

وبوش صب ميه بارده على قفا كل مين أعتمد عليه ....

وأحنا بنركض ورا وزارات ؟؟؟...

وبنحارب الناس اللى همه في النهايه في صفنا , وفي الصف الوطني؟؟؟ ...

***

بعدين معاكم يا جماعه ....

بالله عليكم ,ما فيه عندكم شغله أهم تبلشوا فيها ....

مش الأفضل والأشرف إلكم كلكم تحطوا إيديكم مع بعض مشان تنجّجوا مؤتمر الحركه ؟؟؟

كلّهٌم ست أشهر اللي ضلوا ...

الله بيعينكم تصبروا ...

وبعدين , يا سيدي , خذوا الوزارات اللي بدكم إياها ....

وإلا , بعضكم خايفين ما يطلعهم حصه في المؤتمر ...

وتروح عليهم فرصه استوزار تاريخيه ؟؟؟؟

***

القلب محروق ...

والعقل بده يتفجر ...

والحلق ناشف ....

بهمش يا اخوه , تحملوني شويه ...

ما انا إلا فتحاوي بسيط ...

وما بفهم إلا على قدر عقلي ...

سمعت الأخبار؟؟؟ ـ الحلقه الحاديه عشر ـ

8.11.2008

_ عوافي ياشيخ الشباب ...
_ هلا بالمهلي ..
_ سمعت ...
_ الأخبار ؟؟ لأ , هات شو في عندك وخلصني ...
_ قوم يارجال ركاض ,اليوم رست سفينه كسر الحصار رقم اربعه في مينا غزه .. سفينه الكرامه , إسمها ...يلا نروح نركض بركي على الله طلعلنا شويه مواد غذائيه ولا قنينه غاز او كم ليتر سولار ...
_ يعني يازلمه إنت صدقت عن جد إنهم كسروا الحصار ؟؟
_ ولا شو يارجال ؟؟ هو كذب ؟؟والله السفينه موجوده في المينا , وهناك شي ميت زلمه واقفين لإستقبالها !!
_ طيب وبعدين ؟؟ بعد الكم خطبه إللي رايحين يفقعوها قدام التلفزيونات والصحافه ,
شو راح يصير فكرك ؟؟
همه رايحين يمدوا خط أنابيب كاز وغاز وميه وأكل للناس ؟؟
ولا راح يفتحوا يعني خط سفريات للرايح والجاي, مشان الناس تروح تشوف وجه ربها , والتجار يسافروا طلب لرزق الله , والطلاب يروحوا على جامعاتهم , والمغرَبين التعيسين يرجعوا عند اهلهم وإحبابهم ؟؟؟

***

_ وإلا شو ؟؟؟
_يارجال صلي على النبي ...
_ اللهم صلي وسلم عليه ..
_يا اخي .. والله لو الحكي الفاضي والتمثيليات والخطب الرنانه بتشبِع , لكنّا من زمان صرنا اغلظ من اتخن امريكي ...
_ ليش هالحكي اللي بيهبط المعنويات يارجال ؟؟
يعني إنت ضد كسر الحصار ؟؟؟
_ يا رجال كيف بدك اكون ضد كسر الحصار وأنا زي كل هالبشر راح اموت من الجوع ومن الكتم وقله الحركه ؟؟؟
_ طيب ليش يعني بتحكي هيك عن سفينه الكرامه ؟؟؟
_ والله ياخوي ما انا ضد زيارات النشطا الأوروبيين والعرب لغزه , بالعكس أنا بقَدِر شجاعتهم وتضحيتهم , وبعرف دورهم بالتعريف بعذابات شعبنا في بلادهم ...
_ طيب , ومعناته ...
_ يا اخي , في فرق كبير بين عمل إعلامي , رمزي , وبين رفع الحصار الفعلي ...
_ ؟؟؟
_ يعني زي هذيك الأم اللي كانت تطبخ حصوه على النار مشان ولادها يصبروا على الجوع , ويتعبوا وهمه بيستنوا الطبخه , ويناموا وهمه بحلموا بوجبه اكل تسد جوعهم !!!
_ يعني كله حكي فاضي وبس ؟؟؟
_ مش بالضروره ... لإنه العمل الإعلامي الرمزي , في حالتنا مهم , بس , لما جماعتنا بحاولوا يقنعونا إنهم هيك كسروا الحصار , ساعتها بيكونوا قاعدين يوكلوا بعقلنا حلاوه ...
_ ليش ؟؟؟
_ لإنه اطفال غزه واهلها , رغم السفينه, راح يناموا جوعانين الليله بعد ما رست السفينه , تماما زي مبارح قبل ما ترسوا السفينه .. والطلاب راح يظلوا يستنوا الفرج مشان يروحوا على جامعاتهم في بلاد بره , والتجار راح يظلوا محكومين بمافيا الأنفاق , والسجن راح يظله مغلق , وإحنا راح نموت من القهر ...
_ الله واكبر يا شيخ , والله معاك حق ...
وبعدين يعني ؟؟؟

***

والحل ؟؟؟
_ والله يا صاحبي , ما دام جماعتنا مفكرين إنهم قادرين يشبعونا بالهوا , والحكي الفاضي والرمزيات , عمره ما راح يكون هناك حل !!!

***

_ والمطلوب ؟؟؟
_ المطلوب رجال قد المسؤوليه ... واعيين إنه ما في خلاص لا إلهم ولا إلنا إلا إذا بواجهوا المشكله من إساسها ...
_ وشو هو أساسها ؟؟؟
_ شعب واحد , وطن واحد , مصير واحد ...
_ وضح اكثر يا رجال , مش فاهم عليك ؟؟؟
_ اليهود اليوم فيهم يقنعوا العالم إنه الحصار هو ضد ’’الإرهابيين الإسلاميين ’’ ... وفيهم يرددوا إنه الحصار فيه فايده للسلام لإنه بيعاقب وبيضعف الجماعه اللي واقفه ضد ’’ السلام ’’ .. وهيك كل ضغط العالم بدل ما يتوجه على الصهاينه مشان إنقاذ شعبنا المّعَتَر في غزه , بيتوجه بس على ’’حماس’’ مشان يكسروا حده خطابها الديماغوجي المتصلب (نظريا) ...
بس لو جماعه ’’حماس’’ بيتوجهوا عن جد مشان وضع إيديهم بإيدين بقيه القوى الفلسطينيه , وبيتفاهموا مع الجميع على خطاب سياسي معتدل ومقبول عند العالم والناس , عندها بتعود الصوره لحقيقتها , إحتلال عنصري بيعمل على تركيع شعب , وبيستعمل طرق لا اخلاقيه مشان يوصل لإهدافه , ومنها برمجه وتنظيم المجاعه في غزه , وخنق الناس في سجن كبير ...
في هذيك اللحظه , كل العالم راح يوقف معنا ويطالب برفع الحصار , والصهاينه راح يلاقوا حالهم وحيدين في مواجهه العالم , بدل ما نعطيهم حجه مشان يحطوا جزؤ من شعبنا في الزاويه , ويجيشوا جزؤ كبير من العالم ضده ...
_ والله يا رجال كلامك زين ...

***
...وشو مانع جماعتنا إنهم يركضوا مشان يحطوا إيديهم بإيدين بقيه إخوانهم , ويخلصوا شعبنا من هالحاله ؟؟؟
_ والله ياخوي , حساب الحقل ما بتناسب مع حساب البيدر ...
_ شو يعني ؟؟؟
_ الجماعه عندهم حسابات ثانيه , ما إلها علاقه لا بالشعب ولا بهمومه ...
_ كيف يعني ؟؟؟
_ اول شي , الذبّان ما بيلتم إلا على الأوساخ ....
_ ؟؟؟؟
_ يعني , لو ما في حصار وجوع وقِلّه , كيف بدك بعض الناس تظلها ملتزمه فيهم , وقابله إنه اظرطهم يصير امير مؤمنين ومرشد ومعلم وقائد ...
_ يعني الحصار بيفيدهم وبيفيد مخططاتهم ؟؟؟
_ عليك نور يا إبن الحلال , بالحصار همه قادرين يشتروا كثير من الناس بالقرشين اللي بوخذوهم من بعض الدول بإسم نُصره الشعب الفلسطيني ...وبنفس الوقت , بقيه الناس ما بيظل إلها هم غير تركض ورا لقمه العيش , وهيك همه بيسرحوا وبيمرحوا على هواهم بدون معارضه حقيقيه ومنظمه , لإنه الجوعان , قبل ما يركض ورا السياسه , بركض ورا لقمه العيش ...
_ وثانيا ؟؟؟
_ بالحصار جماعتنا بيظهروا حالهم وكإنهم قمه الثوره والصمود , وهيك بيستدرجوا عطف العرب والمسلمين ...وبيحاولوا يجيّروا هالتعاطف مشان الضغط على الدول العربيه والإسلاميه لتحقيق مصالح تنظيميه على حساب بقيه القوي الفلسطينيه ...
_ وشو كمان ؟؟؟
_ بالحصار بيعمقوا الشرخ بين الفلسطينيين , وبيزرعوا بذور القسمه والفراق بين جناحين الوطن ...
_ كيف صارت هاي ياخوي ؟؟؟
_ يعني لما الناس في غزه بتشوف إنها هيه عايشه من القله , وإخوانهم في الضفه بيتلقوا مساعدات دوليه وعندهم مشاريع وآمال مستقبليه , ماهو الشرخ راح يتوسع ويصير قد مغفره ربنا ....

***

_ يعني مشان هيك فكرك قاعدين بيبحبشوا عن حجج مشان ما يروحوش على حوارات القاهره ...؟؟؟
_ والله ياصاحبي إنك بديت فعلا تستوعب سياستهم ...
_ صاير بدهم عشرين دكتور عباس وما بيكفيهم ...
_ .....؟؟؟؟....!!! .....

سمعت الأخبار؟؟؟ ـ الحلقه العاشره ـ

4.11.2008

_ سلامات ياعم ...
_هلا بالرجال , زمان عنك ؟؟
_دنيا .. الله يعين الجميع ...
سمعت الأخبار ؟؟؟
_ هات تانشوف شو عندك جديد ؟؟
_ الظاهر إنه في إقتراح من دول عربيه مشان إستقبال اللي ’’تورطوا ’’ في ’’معارك غزه ’’ ...
_ قصدك هذول اللي قتلوا وسحلوا ورقصوا على جثث إخوانهم الفلسطينيين ؟؟ و إللي عذبوا واهانوا وهشموا ركب الشباب في شوارع غزه ؟؟؟
_ آه , همه هذول ؟؟؟
_ عجيب !! طيب ليش بدهم يستقبلوهم في بلاد العرب ؟؟؟
_ قال يا سيدي مشان تسهيل نجاح تطبيق اتفاق ’’وحده وطنيه’’ .. ؟؟؟

***

_ طيب وشو رد فعل إللي رايحين يتحاوروا ؟؟
_ فتح لليوم ما في عندها ولا أي رده فعل على هالموضوع ...
_ زي العاده ..
_ اما جماعتنا , رد عنهم برهوم افندي ...
_ وشو قال برهومنا ..
_ قال إنه في لجنه إسمها لجنه ما بعد 11 حزيران ,وهاي 'اللجنة رايحه تدرس كيفية اتمام المصالحة وحل الذموم وانهاء كل المشاكل بما فيها الموظفون والمعتقلون والرواتب' وزاد مشان يوضح اكثر ’’ انه المصالحة رايحه تعيد الحقوق لأهلها وتنهي كل المشاكل.’’
_ يا سلام يارجال , والله جماعتنا ’’فطاحل’’ زمانهم !

***

_ شو قصدك ياعم ؟؟؟
_ شوف يا خوي ...
اول شي , مشاكل الموظفين والمعتقلين والرواتب , قد ما كانت كبيره , مش ممكن مقارنتها مع خساره اهل كل اللي سقطوا ضحايا الإجرام اللي صار في غزه , ولا مع قيمه خساره شاب لركبته وتحويله لعالّه على أهله , بعد ما كان مُعين إلهم ..
_ والله معك حق ..
_ إثنين : نقل المجرمين والقتله لدول عربيه , جريمه ثانيه , اكبر من جريمه القتل نفسها ...
_ ليش ياعم ؟؟؟
_ لإنها بتعني نوع من المكآفأه لهذول المجرمين , وبترسل رساله غلط لكل اللي ما في في قلبهم رادع وطني واخلاقي وإنساني ...
_ شو هي هالرساله الغلط اللي بتحكي عنها ؟؟
_ الرساله بتقول ...
’’ أقتل فلسطيني , ومكافأتك بتكون رحله لدوله عربيه , وإستقبال , وإقامه ومخصص , لحد ما جماعتك يلاقولك مخرج مشان ترجع لبلدك بعد ما يجف دم ضحيتك ’’ ...
_ طيب ماهَيُه برهوم إقترح ’’حل الذموم ’’ , وهيك بتنتهي المشكله ..
_ يارجال صلي على النبي ..
ماهو هذا الحل أظرط من اللي قبله , وفيه كمان رساله اخطر من اللي سبقتها !!
_ معقول ؟؟ طيب هات ورجيني شو هي هالرساله الغلط اللي بتحكي عنها ؟؟
_ الرساله الغلط ياسيدي بتقول ...
’’ أقتل فلسطيني , وبعدين تنظيمك بدفع ’’ثمنه’’ , (دِيّه) , وانت بتطلع منها مثل الشعره من العجينه ...
_ فيه منه والله , بس ليش هاي الرساله اخطر من اللي سبقتها ؟؟
_ ياسيدي , الرساله هاي اخطر لإنها رايحه تدفع المجرمين والقتله والعملا على تغطايه حالهم بلحاف التنظيمات قبل ما يقوموا بجرايمهم ..
ورايحه تسمح إلهم ولكل الأغبياء انهم يعتقدوا انه بكفيهم غطا تنظيمهم مشان يذبحوا مين ما بدهم وإيمتى ما بدهم ..
يعني بكفيناش هسه غطا اللي وَكَلوا حالهم مفتيين , وحللوا دم البشر , مشان كمان نلاقى للمجرمين الصغار اغطيه جديده ؟؟؟
_ والله معاك حق ...
_ وبعدين يا خوي , وهاي النقطه الثالثه , هو المجرمين همه بس اللي اطلقوا النار ؟؟
_ شو قصدك ؟؟
_ يعني , طيب ياربي , هيه قياداتهم اللي أعطتهم الأوامر وحللت إلهم القتل , واعطتهم غطا ديني واخلاقي ووطني , يعني هيه مش مسؤوله عن كل هالدم اللي سال ؟؟؟ ..
وكيف آخرتها نفس المجرمين بيقرروا لحالهم كيف يهربوا من مسؤوليتهم عن كل جرايمهم ( رحله سياحه وإستجمام , ولاّ كم دولار من الدولارات اللي جمعوها بإسم نصره الشعب الفلسطيني) ... ؟؟
يعني فعلا راح ينطبق علينا المثل اللي بيقول ’’ حاميها حراميها ’’ !!

***

_ والله يا اخي كإنك بتحط ألغام قدام الحوار الفلسطيني ...
هو يعني إنت ضد إننا نخلص من ورطه الصراع , ونتوحد من جديد قدام الصهاينه ...
_ لا سمح الله يارجال , بالعكس انا وكل الناس مع نجاح الحوار , ومع حل الخلافات , ومع حصر الصراع في حده الأدنى ...
_ طيب كيف يعني إنت مع حل المشاكل , وبنفس الوقت بترفض الحلول المقترحه لحسم مشكله اللي إيديهم ملطخه بالدم الفلسطيني ؟؟؟
_ ياسيدي شوف ...
أو بيصير إتفاق ترقيع , وتبويس لحى , وصور قدام التلفزيونات , بعد ما يكونوا مروا مرور العابرين على كل القضايا الخلافيه المعقده , وطبطبوها مشان يرجعوا مثل حليمه لعادتها القديمه , وهيك , إتفاقهم ما راح يصمد الوقت الكافي مشان يجف الحبر اللي فيه وقعوه ..
وإما بيصير إتفاق كامل متكامل , وعادل , بيحط القانون فوق الجميع , وبيحمل كل مسؤول مسؤوليته عن تصرفاته , وهيك بيصير في عنا ضمانات جديه للمستقبل ..
_ فيك توضح اكثر ؟؟؟
_ شوف يا سيدي ..
إذا ما صار إتفاق واضح على سياده القانون , معناته إحنا بندق مسمار جديد في نعش حلم شعبنا في دوله القانون , وبنعطي ضو اخضر لكل ضحيه ومتضرر إنه يوخذ ثاره بإيده , ولكل مجرم وإبن حرام إنه يستمر بإجرامه لأبد الآبدين , يعني الإتفاق ماراح يصمد إلا الفتره اللي بده إياها كل تنظيم بإنتظار الفرصه السانحه مشان يوكل الثاني ...
اما إذا صار إتفاق على سياده القانون , وتحميل كل واحد مسؤوليه اعماله وافعاله , وتحميل كل مسؤول مسؤوليه قراراته , عندها , راح تكون رساله مبدئيه واضحه للجميع ...
_ شو هي هالرساله ...
- ....’’الحق راح يرجع لصحابه مهما طال الزمن ’’
, ’’وكل مجرم راح يدفع ثمن جريمته حتى لو كان قائد في اكبر تنظيم ’’
, و هيك ياسيدي كل الناس والتنظيمات رايحه تشوف إنها مسؤوله عن كل تصرفاتها وممارساتها , وهيك بس بنقطع الطريق على كل مجرم وخاين وعميل , وبنورجي للجميع إنه المجرم , مهما طال الزمن , راح يدفع ثمن جريمته , وإنه ما في تنظيم أعلى من القانون او قادر يتحايل عليه ويحمي المجرمين والقتله ...
هاي ياسيدي اول واهم لبنه في بناء وطبيعه دوله المستقبل , فإما ’’سُلطه ’’ القانون , او ’’سَلَطه ’’ كل من ايده إله ....

***

_ والله ياخوي مبين عليها طويله هالشغله ...
_ هي طويله وبس !! مالسه في هناك الف شرط وشرط , الظاهر إنه ’’حوارهم ’’ راح يصير فيه مثل ’’مفاوضات السلطه مع المحتل ’’ ...
_ كيف يعني ؟؟؟
_ يعني إنت بالله عليك مش شايف كيف صاروا يستعملوا نفس المصطلحات المستعمله في موضوعه ’’المفاوضات’’ ؟؟؟
_ وضح لي عن شو بتحكي ؟؟؟
_ ’’خارطه طريق ’’ , ’’إتفاق رزمه’’ , ’’ إعلان مبادئ’’ , ’’تشكيل لجان للقضايا الأساسيه’’ , ’’مبادرات حسن نيه’’ , وما ضل إلهم إلا يبيعونا ’’إتفاق رف ’’ ...
_ فكرك بيصير فينا هيك بعد كل هالعمر والنضال والتضحيات ؟؟؟

_ في هيك عالم , ومع هيك ’’قيادات’’ , الله وكيلك كل شي ممكن ...
_ طيب يارجال والقدس وفلسطين والإحتلال والسجنا والشهدا ..و ..

_ روح يارجال , والله ماضل إلك إلا تروح تشوف الدكتور عباس ...
_ بعدين معك يارجال , طيرت نافوخي بدكتورك هذا , قوللي مين هو وخلصني من حكايته الله يخليك ...
_ سلامات ياعم ...

سمعت الأخبار؟؟؟ ـ الحلقه التاسعه ـ

20.09.2008

_ عوافي ياعم ...
_ هلا ...
_ سمعت الأخبار اليوم ؟؟؟ ...
_إستنى ...انا اللي بدي اعطيك اخبار , لإنه قلبي ملان , وراسي بده ينفجر ؟؟
_سلامتك ياخوي .. شو هالأخبار اللي نغصت عليك يومك ؟؟؟
_إسمع هالحكايه وبعدين بنشوف إذا ما إتنغص يومك انت الثاني بعدها ..
_هات ياخوي , ماهيه حياتنا الله وكيلك صايره كلها تنغيص بتنغيص ...
_ سمعت بالمرحوم رائد الحرازين ؟؟؟
_لا والله ياخوي ...
_هاذا يا طويل العمر شاب فلسطيني بعمر الورده .. اجوا عليه جماعه , الله وكيلك مثل خفافيش الليل الساعه ثنتين ونص بالليل .. خطفوه من بيته قدام اهله ..وطلعوه بسيارتهم الماغنوم ....
_ يهود ؟؟؟
_لا والله , فلسطينيين من جماعه امن سلطتنا الإلآهيه في غزه ؟؟؟
_ إذا جماعه أمن , معناته بسيطه ....
_ شو قصدك ؟؟؟
_يعني ما هو الأمن في خدمه المواطن زي ما قال أمينا ابو العبد ... واللي بعتقلوه ما عليه خوف ...
_كيف ياخوي ؟؟؟
_ يعني ما هو ابو العبد قال انه المعتقلين بيصير معهم تحقيق بإشراف قانوني , وإذا ما ثبت عليهم شي بيروحوا عند اهلهم مطمئنين سالمين , وإذا في عليهم شي بيقدموهم للمحاكمه قدام قضائنا العادل ...
_ يا سلام على عدل الخليفه , هات تنشوف ياخوي وين العدل في حكايه الشاب رائد ...
_هات ...
_ قلتلك انهم اخذوه الساعه ثنتين ونص بالليل من بيته , وبعد شي ساعتين عادوا ورموه بالشارع ...
_شايف عاد , هذول يعني خافوا إنهم يضيعوا عليه سحوره بين اهله ...والله إنها دوله خلافه وتقوى ....
_يا سلام على التقوى , الزلمه رموه بالشارع محطم مهشم , وجسمه زي الخرقه الباليه , ممزع ومكسر , مافيه شقفه سالمه من التعذيب ...
_ معقول ؟؟؟
_ هاي الصور ياسيدي , شوفها , هيه بتحكي من حالها ...



_الله واكبر , استغفر الله من الشيطان الرجيم , لاحول ولاقوه إلا بالله ....
_ الجماعه ياخوي , بعد ماعذبوه , شحطوه ورا سيارتهم , ولما شافوا انه راح يفرط بين إيديهم , رموه زي كيس زباله في الشارع ...
_وبعدين ؟؟؟
_ اهله المساكين , كان الله في عونهم , حاولوا يوخذوه على مستشفى للعلاج , بس ياحرام فرط بين إيديهم على الحاجز ...وطلعت روحه عند ربها ...
_ يا حرام , إحنا في رمضان يارجال , هذول المجرمين لازم يكونوا يهود , لإنه المسلم ما بعمل في اخوه المسلم هيك , حتى لو كان عليه شي ...
_ لأ ياخوي , هذول مش اليهود اللي عملوا فيه هيك ....
_ معناته هذول مجرمين خارجين عن القانون , لإنه رجال القانون والأمن ما بيعملوا هيك في مواطن حتى لو كان مذنب, حتى هذول مش رجال ولا إلهم علاقه بالإنسانيه , لإنه الرجال اللي في قلبه شويه إنسانيه مش ممكن يعمل هيك في إنسان ثاني ...
_ لأ يا سيدي , هذول من رجال امن دوله خلافه اميرنا ابو العبد ...
_حرام عليك تتجنى على الناس , لو كانوا رجال امن زي ما بتقول , بكره جماعتنا بيعتقلوهم وبيحاكموهم قدام كل الناس على جريمتم البشعه هاي ...
_ يا سيدي , المجرمين معروفين بالإسم , واسمائهم واحد واحد نشرتها الجرايد , ولحد اليوم بسرحوا وبمرحوا بشوارع غزه بسيارتهم الماغنوم , وبتحدى امير مؤمنينكم ووزير داخليه إمارته الإلآهيه إنهم يوقفوهم ويحاكموهم على جريمتهم البشعه هاي ...
_والله هاذا هو اقل شي ممكن ينعمل ...
_تنشوف , شو ورانا إحنا , ما هينا قاعدين , والزمن قدامنا , وبنستى عدالتهم وتقواهم ..
_تنشوف ...
_والله يا خي , لو بدهم يطبقوا العداله لكانوا طبقوها من زمان , ماهيهم مئات المجرمين اللي ذبحوا وعذبوا مئات الشباب الفلسطينيين , لساتهم بمارسوا هوايتهم في شوارع غزه وفي اقبيه ودهاليز مراكز الخطف والإعتقال , وما حدا سائلهم وين رايحين ولا شو بيعملوا ...
_ طيب ليش برأيك الوضع هيك ؟؟؟
_ ما فيش إلا تفسير واحد ...
_هات تاشوف ...
_الجماعه بدهم يحافظوا على سلطتهم , زي ما فرضوها , بالإرهاب والقمع والدم والنار , عشان ما حدا يسترجي يرفع صوته ويقول لهم وين رايحين , وشو بتعملوا بهالشعب المعتر ... ومشان يحافظوا على إمارتهم ونفوذهم وإمتيازاتهم , الجماعه بحاجه لكل هالمجرمين اللي ما عندهم لا إحساس ولا ضمير , وبدل ما يعاقبوهم بالعكس بيكرموهم وبغدقوا عليهم من فتات طاولاتهم , وبيكبروا راسهم وبيضاتهم لما بيقولوا عنهم إنهم بمثلوا الأمن والأمان , والعدل والتقوى ....
_ الله اكبر على كل ظالم وإبن حرام ...
_ الله اكبر ...

سمعت الأخبار؟؟؟ ـ الحلقه الثامنه ـ

29.06.2008

_سلامات ياعم ...

_اهلين ياخوي ...

_سمعت الزهار اليوم ...

_شو قال الدكتور ؟؟؟

_هاذا ياخوي بيقول إنه اللي بيخترقوا التهدئه همه إما ناس خارجين عن إتفاق الفصائل , وإما عملاء...

_ياسلام .. يعني هسه اخونا الزهار ما سمعش انه الفصائل اللي بيحكي عنها كانت وضعت تحفظات على إتفاق التهدئه , وحفظت لحالها حق الرد على الصهاينه إذا ظلوا يجرموا بحق شعبنا في الضفه ؟؟
ويعني هوه صار اليوم يعتبر كل هالناس اللي عبوهم على فكره ’’المقاومه لآخر فلسطيني بغزه ’’ , واللي مش قادرين يفهموا موقف حماس , ولا يجمطوا فكره إنه اليهود يسرحوا ويمرحوا في الضفه , ويقتلوا على كيفهم , والصواريخ مكدسه في المخازن في غزه ,
هذول صاروا اليوم عملا ؟؟؟

_هذا اللي أجاك ...

***

اخونا بيقول إنه في أيادي خفيه بتحاول تلعب في غزه ...

_معقول ؟ ...
طيب مش مبارح صيام صرح إنه الأمن والأمان مستتب بغزه , وانهم مسيطرين على الوضع ؟؟ كيف معناته في أيادي خفيه ؟؟
وينهم ياخوي شرطتهم واجهزه امنهم ؟؟
شو بتعمل ؟؟؟
ولا لتكون مشغوله بس بمراقبه وإعتقال جماعه فتح والسلطه وتاركين العملا يسرحوا ويمرحوا على كيفهم في شوارع البلد ؟؟؟

_بيقول انهم رايحين يتعاملوا مع اللي بخترقوا التهدئه قدام المحاكم والقانون ...

_معقول يارجال ؟؟
من إيمتى يعني صار اخونا الزهار بعترف بالمحاكم والقانون ؟؟؟
مش يعني جماعته همه اللي كانوا اول مين خرج عن القانون ؟؟؟

_كيف ياخوي خرجوا على القانون ؟؟

_ياصاحبي تذكر لما السلطه الشرعيه كانت موجوده بهالبلد , مش كانوا دايما يطالبوا جماعتنا إنهم يوقفوا ضرب الصواريخ مشان مصلحه الناس ومشان مايعطوا عذر للصهاينه ينتقموا من شعبنا , ومين كان في هذيك الأيام يخرج على القانون ؟؟ مش همه نفس اللي بيطالبوا اليوم بإحترام القانون ؟؟؟
يعني ليش ياخوي قانون اليوم احسن من قانون مبارح ؟؟ ...
وبعدين هوه يعني اخونا الزهار نسي إنه جماعته همه اللي إنقلبوا على السلطه الشرعيه ودمروا مقراتها وإحتلوها وقتلوا اللي كانوا فيها ؟؟
وين كان القانون اللي بيحكي عنه اخونا الزهار اليوم ؟؟؟
وبعدين ياخوي هوه الرجَال نسي كل جماعته اللي قتلوا وسحلوا وطخوا على ركب الناس ؟؟؟
وين كان القانون يوميتها ؟؟؟
ولا يعني هذول بيحقلهم يخرجوا إيمتى ما بدهم عن القانون وما في سلطه تقدمهم للمحكمه وتطبق عليهم القانون همه الثانيين ؟؟؟
وكل هالشباب اللي خطفوهم وسجنوهم جماعته , هذول ياخوي ليش مالهمش الحق يعني يتقدموا لمحكمه تنشوف شو ذنبهم وليش خطفوهم جماعتنا من بيوتهم ؟؟؟

_يعني بدك تقول أنه عند الزهار فيه قانونين ...

_اه والله ياخوي هيك الظاهر ...
قانون بيتطبق على عامه الشعب اللي مش مع تنظيمنا وبيفرض عليهم يلتزموا باللي بدنا إياه وباللي بتقرره قيادتنا ...
وقانون ثاني بس لجماعتنا بيسمح لهم يعملوا اللي بدهم إياه بدون محاسبه حتي لو كان اللي بيعملوه مخالف للمصلحه الوطنيه , وحتى لتعاليم ديننا الحنيف ...

_صح والله ,

***

ماهو الزهار بيقول بنفس المقابله إنه اللي بيخالف التعليمات من الفصائل رايح يعتقلوه وينزعوا سلاحه , قال لأنه هذا مش برنامج مقاومه وإنما برنامج تخريب للمقاومه ..

_الله اكبر يارجال ...والله إنهم الجماعه صاروا يضحكوا على عقولنا على المكشوف ...

_كيف ياخوي ؟؟؟

_يارجَال ...
لما مبارح فتح وجماعه السلطه كانوا يقولوا إنه ضرب الصواريخ ماهو مقاومه , كانوا جماعتنا يقولوا عنهم خوَن وبدهم يحموا الصهاينه , واليوم صاروا يقولوا إنه اللي بدهم يضربوا صواريخ هذول همه اللي الخوَن اللي بدهم يخربوا المقاومه ...
شو معناته هذا غير إنه ضحك على عقول الناس .؟؟؟
يعني اخونا الزهار بده يقنعنا إنه دايما معه حق إن كان مع او ضد ضرب الصواريخ , وإنه جماعه فتح والسلطه على غلط لما كانوا ضد ضرب الصواريخ واليوم كمان ...

***

_هذا بيقول إنه كل الناس اللي بتحكي مثلك ما بيفهموا شي , لإنه حماس هيه اللي حملت مشروع المقاومه ودفعت ثمن غالي مشانه ...

_ياسلام يارجال ...
شوف هالزلمه اللي قلب جاكيته بخمس دقايق , بعد ما ضحكوا عليه الصهاينه وأخذوا منه كل شئ مقابل ولاشئ , وجاي اليوم يحكي لنا عن الفهم ؟؟؟
يعني هوه مش شايف انه الإتفاق اللي قبلوه همه وبدهم يفرضوه على العباد هوه إتفاق ناقص , ومافيش فيه ولا ربع اللي كانت فتح والسلطه حاصلين عليه من الصهاينه ؟؟؟
وبعدين ياخوي شو هاي نغمه إنه جماعته همه اللي حملوا المقاومه على كتافهم ودفعوا ثمنها ؟؟يعني مش هذا برضه إستغباء للناس ؟؟؟

_ليش ياخوي إستغباء للناس ؟؟؟

_هسه إنت بالله عليك بتعرف واحد في كل العالم مش عارف انه فتح هيه اللي فجرت المقاومه الفلسطينيه يوم ماكان الزهار ومخاتير مجموعته مشغولين في حكاياتهم الفقهيه , ويوم ما كانوا بيعتبروا انه الأوليه هيه ’’لإصلاح المجتمع’’ قبل مقاومه الصهاينه والإحتلال ؟؟؟
هسه ياخوي فكرك في حدا في الدنيا مابيعرف إنه الشعب الفلسطيني قدم عشرات الألأف من الشهدا والسجناء والجرحي قبل ما تنخلق حماس , لما كان كل هذول اللي بيدعوا إنهم همه المقاومه قاعدين في زوايا المساجد بيسبحوا بحمد ربنا , وبيشككوا بكل الناس اللي بتقاتل وبتقاوم الصهاينه ؟؟؟
هسه ياخوي في حدا , حتى في غابات افريقيا , ما بيعرف إنه هالأكثر من خمس آلاف شهيد اللي سقطوا في هالإنتفاضه , والأكثر من احداشر الف سجين , همه ولاد هالشعب الفلسطيني , ومن كل فصائله , وأكثر من نصهم من شباب فتح ؟؟؟
وبعد كل هالحقائق اللي بيعرفها حتى الولد الصغير في بطن امه , جاي علينا هذا الزلمه مشان يقول إنه المقاومه هيه جماعته , وإنهم همه اللي قدموه الكثير من التضحيات مشانها ؟؟؟
طيب مش هذا معناته برضه إستخفاف بكل هالشهدا وكل هالمساكين المرميين في سجون الصهاينه اللي مش من جماعه الزهار ؟؟؟

_بس هذا دكتور يارجال ...

_ والله ياخوي باين إنه حصل عليها بالسحبه شهادته ...

***

_هذا بيقول إنه صاير إتفاق مع العائلات إنها تسلم ولادها الخارجه عن القانون ...

_ياسلام ... والله زمن ...يعني ياخوي انت بتعرف عيله في الدنيا بتوافق عن طيبه خاطر تعطي ولادها لهذول الجماعه ؟؟؟
مين بيضمن لهم محاكمه عادله ؟؟؟
يعني إنت بتتصور ولادهم واقفين على باب البيت وبيستنوا جماعتنا مشان يوخذوا ابوهم للسجن ؟؟؟
وبعدين ياخوي بأيه تهمه بدهم يلقوا عليهم القبض ؟؟؟
مقاومه الإحتلال ؟؟؟
الرد على جرايمه في الضفه ؟؟؟
.........والله هذا آخر زمن صارت فيه مقاومه الإحتلال تهمه عند اللي بيدَعوا إنهم ابوا المقاومه !!!!

***

_هذا بيقول إنه البندقيه اللي مش قادره تنجز مقومات صمود صارت بندقيه بدون فايده ...

_والله ما اني عارف إذا ما صار هذا الزلمه ’’فتحاوي’’ , بدون ما يعرف ...

_ليش يارجال ها’’التهمه’’ ؟؟؟

_طيب مش يعني هذا اللي بيقوله هوه شعار من شعارات فتح , اللي كانوا ولسه بيرددوه , ’’البندقيه دون هدف سياسي تتحول الى بندقيه قاطع طريق ’’؟؟؟
ليش مبارح لما فتح كانت تقول هالحكي , كان اخونا وجماعته يقولوا انه هذا إستسلام وإنبطاح , واليوم الله وكيلك ,صار حكي عقل ومنطق ؟؟؟

***

_بيقول كمان إنه الأمور ما راح تعود طبيعيه بيوم واحد , بس رايحه تعود طبيعيه ؟؟؟

_شو يعني ياخوي طبيعيه ؟؟؟

_يعني الصهاينه رايحين يسمحوا للمواد الأوليه إنها تدخل لغزه ...

_هالله هالله ... والله زمن اللي صار فيه دخول الطحين والسولار والشيبس لغزه بيعني عوده الأمور الطبيعيه للفلسطينيه ...

_شو بتقصد ياخوي ؟؟؟

_هسه مش قبل الإنقلاب كان كل هالحكي متوفر عنا واكثر ؟؟؟

_صح والله ياخوي ..

_يعني كل هالعذاب والعرق والدم مشان نرجع مثل ماكان قبل ؟؟؟

_هيك الظاهر ...

_إذا ليش ياخوي كل هالتضحيات ؟؟؟
على الفاضي ؟؟
......وبعدين ياخوي , يعني الزهار نسي إنه الضفه والقدس تحت الإحتلال , وانه مفاتيح سجن غزه لساته بإيدين الصهاينه ؟؟؟
شو هو الطبيعي بهالوضع بالنسبه للدكتور ؟؟؟

_والله ياخوي الواحد بطل يفهم على هذول الجماعه ...

***

تصور إنه بيقول انه فتح معبر رفح متوقف على موقف فتح والأوروبيين , وإنهم واقعين تحت ضغط امريكي , يعني إذا معبر رفح ما إنفتح بيكون هذا من تحت ورا راس فتح اللي بتكون رضخت للضغوط الأمريكيه , وبهذيك اللحظه بيهدد انه يفضح فتح في الشارع ...

_والله عجيب ياخوي امر هالبني آدم , بيقول الشئ وبنفس الوقت بيقول نقيضه ...

_كيف ياخوي , هاذي ما فهمتهاش ؟؟؟

_هسه مش هو بيقول انه التهدئه نصر إله ولجماعته ؟؟؟

_آه صح ..

_ومش بيقول انهم فرضوا على الصهاينه ياللي بدهم إياه ؟؟؟

_صح ..

_ومش بيقول إنه الأمور رايحه تعود لطبيعتها ؟؟؟

_مزبوط ...

_طيب كيف يعني نصر وفرضوا اللي بدهم إياه والأمور بتعود لطبيعتها , كل هالحكي بدون ما يكونوا ضمنانين على الأقل فتح باب السجن اللي إسمه معبر رفح ؟؟؟
وين النصر ياخوي ؟؟؟
إما بيكونوا حققوا اللي بدهم إياه وإنتصروا ,
يعني فرضوا فتح كل المعابر ومن ضمنها معبر رفح ,
وإما بيكون فتح معبر رفح بإيدين فتح والأوروبيين ومصر ,
وهالحكي بيعني إنهم لا فرضوا ولا إنتصروا ولا غراب البين ..

***

_يعني برأيك الدكتور الزهار يروح يسلم على الدكتور عباس ...

_ويبوس على ايده كمان ...

_بس مشان الله , قللي هالقيت مين بطلع هذا الدكتور عباس ...

_بيهمش ياخوي ,اصبر عليه كمان شويه ....

سمعت الأخبار ؟؟؟ ـ الحلقه السابعه ـ

28.06.2008

_السلام عليكم .

_هلا بأبو الشباب..

_سمعت الأخبار اليوم ..

_هات تأشوف شو في عندك..

_هاذا الشيخ ابو زهري , مبارح , لبس احلى هدومه , وسرّح شعره , وحط على خلقته احلى إبتسامه , وفقعنا مؤتمر صحفي ....

_يا أرض إحفظي ما عليكي ...
شو بَق علينا ؟؟؟
... ذهب ؟؟؟

_هذا ياسيدي بيقول إنه إذا ما في لحد اليوم حوار فلسطيني فلسطيني , هذا لإنه جماعه السلطه رضخوا للضغوط الأمريكيه الصهيونيه , اللي بتمنع فتح من إنها تحاور حماس ....

_وليش ياخوي على رأيه مابدهمش ...

_قال ياسيدي لإنه امريكا مقهوره من صمود حماس ونصرها ...

_ اي نصر هذا ؟؟؟

_فرض التهدئه ..قال ..

_والله ياخوي إذا المثل بيقول ’’اذا ما بتستحي ,إعمل اللي بدك إياه ’’ ...
انا بقول ’’ اذا ما في بوجهك شويه حياء , قول اللي بدك إياه ’’ ...

_ليش يارجال ...هذا ابو زهري نوارتنا , ووجه البُكسه عندنا ...

***

_يا سيدي هات تنشوف ذهبيات العم ابو زهري واحده واحده ...ونشوف إذا كان نواره زي ما بتقول ولا ...

_يلا ...

_هسه مش اميركا والصهاينه كانوا رافضين إننا نشارك في إنتخابات التشريعي ؟؟

_صح..

_طيب ,مش فتح وجماعه السلطه وابومازن قالوا لهم , هذول فلسطينيه ولازم يشاركوا بإنتخابات فلسطينيه , وعملوا الإنتخابات غصب عن الأمريكان والصهاينه ؟؟؟

_والله صح ...

_هسه ياخوي , مش بعد الإنتخابات , اجوا الأميركان والصهاينه , وقالوا لفتح وللسلطه , ما بدناش حكومه حماس ولا بدنا حكومه وحده وطنيه فلسطينيه ؟؟؟

_صح...

_طيب مش ابومازن وفتح والسلطه ,كبوا ميه بارده على قفا الأمريكان والصهاينه , ووكل ابومازن , الشيخ هنيه يعمل حكومه غصب عن الأمريكان , وبعدين عملوا معنا حكومه واحده ؟؟؟

_والله ياخوي معاك حق ...

_هسه مش بعدين لما صارت المشاكل والخلافات , قال الأمريكان والصهاينه لجماعه السلطه ولفتح , مابدناش تروحوا على مكه ولا تتفقوا مع جماعه حماس ؟؟؟

_آه والله صح ...

_طيب مش فتح وجماعه السلطه راحوا على مكه ووقعوا الإتفاقيه , غصب عن الأمريكان والصهاينه ؟؟؟

_والله مزبوط ياعم ...

_هسه ,بعدين لما جماعتنا جرونا للحرب على السلطه وعلى فتح , مش الأميركان والصهاينه قالوا لجماعه السلطه , خذوا سلاح ومال قد ما بدكم ,بس إذبحوهم والعنوا ابوا افطاسهم ؟؟؟

_آه والله ياخوي ...

_طيب مش فتح والسلطه ماردوش عليهم وقالوا لهم انه الدم الفلسطيني خط احمر مش ممكن يقبلوا يتجاوزه ؟؟؟

_والله ياخوي إنك بتحكي الصح ...

_هسه مش بعد الإنقلاب قال الامريكان والصهاينه لفتح وللسلطه ,خليهم محشورين في غزه واحنا بنذبحهم وبنجوعهم وبنسكر عليهم كل الحدود ؟؟؟

_آه ..

_طيب مش فتح والسلطه ظلوا يقولوا هذول شعبنا وبنرفض حصارهم وتجويعهم وقتلهم , وظلوا يدفعوا مصاري للموظفين , ويطالبوا العالم برفع الحصار , وظلوا يدينوا كل الجرائم الإسرائيليه ؟؟؟

_آه والله ياخوي ...

_هسه ياخوي مش الأمريكان والصهاينه ما بدهمش الفلسطينيه يكونوا إيد وحده , ولا إنهم يتحاوروا مشان يحسموا خلافاتهم ؟؟؟

_مزبوط ...

_طيب مش فتح والسلطه وابومازن , رغم عن هذول , مدوا إيديهم وقالوا هاي إتفاقيه اليمن اللي وافق عليها الجمبع ودعمها العرب , خلونا نطبقها , ونطلع من هالأزمه , ونوحد الصف الفلسطيني ؟؟؟

_ والله ياخوي ما انا عارف شو اقول لك غير انك معك حق ....

_بعد كل هالحكي ياخوي ...بدي افهم على مين بيضحك اخونا ابو زهري؟؟ ...

_شو قصدك ؟؟؟

_لما هذا الزلمه بيحاول يقنعنا انه فتح والسلطه, اللي مارضخوا لليوم ولا مره للأميركان وللصهاينه , اليوم رضخوا إإإ...
مش هذا يا خوي ضحك على عقول البشر ؟؟؟؟

***

_طيب وحكايه إنه الاميركان والصهاينه مقهورين من نصر حماس ؟؟؟

_يارجال ..مجنون يحكي وعاقل يصدق ... اي نصر هاذ اللي بيحكي عليه هذا الرجال ...
يعني ياخوي لما بنظل مسجونين في غزه , ومفاتيح السجن بإيدين اليهود ,
ولما همه بيعيشوا بأمن وامان , وإحنا بنموت من القهر والجوع ,
ولما همه بقتلوا وبخطفوا اللي بدهم إياه من اهلنا في الضفه وبسرقوا ارضنا على عينك ياتاجر , وإحنا هان بنمنع حدا يرد على كل جرايمهم , وبنحميهم وبنقول زي ماقال النونو ,ماشالله عليه, إنه اللي بيحاول يرد على جرايم الصهاينه اليوم بيكون خارج عن الصف الوطني ...
هذا إسمه نصر ياخوي ؟؟؟
ايه والله لو كنت رئيس دوله الصهاينه لكنت قدمت عشرين ’’نصر’’ مثل هيك لحماس ....

***

_طيب ياخوي معناته ليش اخونا ابو زهري بيخرف هيك حكايات فاضيه ؟؟؟

_شوف ياخوي ...
هذول جماعتنا , من يوم الإنقلاب صاروا امرا ووزرا , وصاروا يحكموا بهالشعب الغلبان على كيفهم , وبإسم الإسلام والمقاومه إنهالت عليهم الفلوس من المساكين اللي صدقوهم , وهيك ياخوي , بنوا لحالهم إماره ماعليها لامراقب ولامحاسب , وصاروا مفكرين إنهم مسكوا الورقه الفلسطينيه بإيديهم , وإنهم بقدروا لحالهم يقرروا مصير هالشعب ويعملوا فيه اللي بدهم إياه , وهذول ياخوي ماصدقوا إنه بعض العرب يفتحوا لهم عواصمهم , وصاروا يفكروا انه بكره كل عواصم الدنيا رايحه تنفتح قدامهم ....
مشان هيك ياخوي , كل شئ إسمه حوار وإتفاق ماهو في مصلحتهم ...

_يعني لما بيقولوا إنه فتح رضخت للأمريكان , هاذا بس مشان يخبوا على الناس إنهم همه اللي رضخوا لمصالحهم الخاصه , وبدهمش لاحوار ولا إتفاق ولا بلوط اصفر ...

_هيّك والله ياخوي فهمتها لحالك ...

_والله يارجال هذول لازم عن جد يسلموا على الدكتور عباس ...

_يا رجال , انا اللى بيقول هالجمله , مش إنت إإ

_في هيك عالم ياخوي , كل الوراق صارت مخربطه , الله وكيلك ...

_بسيطه ياسيدي ...
بس إنت ما بتعرف مين الدكتور عباس ...

_بعدين بقول لك ...

_؟؟؟؟؟؟؟؟؟؟؟؟

سمعت الأخبار ؟؟؟ ـ الحلقه السادسه ـ

27.06.2008

_ سلامات ياعم ..
_هلا ...
بس , الله يخليك , بلاش اخبار اليوم ...
_ ليش يارجّال ؟؟
فلسطيني , وما بده يحكي سياسه ..!!
صاير سويدي ياعم ولا شو ؟؟؟
_لا والله ياخوي , نرويجي لاجئ في السويد ....
ماانت شايفني , الله وكيلك أشقر وابيض وعيونه زرق ...
_طيب يا نرويجي , رشه اخبار صغيره ,عالخفيف ...
_هات يا سيدي , الله بعين , رٌش تنشوف ...
ماهيه قله الشغل بتعلم التطريز ..

***

_بتعرف يا سيدي شو اكثر شئ ترك اثر في الفرنسيين , بعد زياره رئيسهم لبلادنا ؟؟؟
_تصريحاته عن الدوله والإستيطان ؟؟؟
_لا ياسيدي ...
_إنه قضى ثلاث ساعات عِندنا , وثلاث أيام عند هذلاك ؟؟؟
_لا ياخوي ...
_إنه ما راحش رام الله , وراح بس على بيت لحم ؟؟؟
_لا والله ياعم ...
_بعدين معاك ...
يعني بدك تقول لي إنه الجندي الإسرائيلي اللي إنتحر هو اللي أثّر فيهم ؟؟؟
_ولا حتى هاي ياخوي ...
_الله واكبر يارجّال ..
ليكون ثياب الست كارلا اللي بحقها بتطمعي عيله فلسطينيه عشر سنين , وزياده ...
_لا ياعم , برضٌه مش هاي ...
_والله غلبتني معاك ياخوي ...
قول لأشوف وخلصني ...

***

_بيقولوا إنه التلفزيونات في فرنسا فتحت أخبارها على فرقه الموسيقى الفلسطينيه اللي عزفت نشيدهم الوطني اللى بسموه ’’المارسييّز ’’ ....
_شو يعني , عجبهم ؟؟؟
_لا والله يا خوي , هذول فرطوا علينا من الضحك , وفي منهم إنقهر وإستاء ...
_ليش ياخوي ؟؟؟
_جماعتنا , الله وكيلك , شرشحوا النشيد الوطني الفرنسي , قطعوه ووصلوه , وكل واحد منهم كان يعزف لحاله وعلى خاطره , زي ما تقول طوشه عرب وهايصه ...
_هاذا صاير فيهم زي كل هالمسؤلين في بلادنا , كل واحد بيعزف سياسته لحاله , وبِينَغِم علينا اللي بده إياه ...
_اه والله ...
_زي ما تقول عبده موسى بيعزف على ربابته السيمفونيه التاسعه لبيتهوفن ....
_بيت مين ياخوي ؟؟؟
_سيبك يا خوي , إنت والفيزيا صايرين إثنين ....
طيب هسه حرس رئاسي , وتشريفات , وبروتوكول , وفرقه موسيقي رسميه , وطز طاخ .. والله ما عانهم يقعدوا مع بعضهم يومين,مشا ن ينسقوا شويه صغيره بين بعضهم , وكل واحد منهم يحفظ النغم المطلوب منه , يتدربوا على عزف موحد , يفيد خلق الله , ويلعبوا النشيد الوطني لدوله عظمى مثل فرنسا , بدل ما يفضحونا ويشرشحونا قدام العالم والناس ..!!
_هذا اللي أجاك والله ...
_والله ياخوي صاير فيهم بالظبط اللى صاير مع هالمسؤلين عن السياسه في بلدنا ...
كل واحد بيغني على ليلاه , وبيعزف مقطوعته الخاصه وكأنه ما في في كل هالدنيا غيره ...
_والله معاك حق يارجال ....
_تصور ياخوي لو كل هالمسؤولين الفلسطينيه على إيد واحده , بقعدوا مع بعضهم , وبينسقوا بين بعضهم , وبيتفقوا على الهدف , وعلى دور كل واحد منهم لتحقيقه , وبعدين كل واحد بيعزف اللحن المتفق عليه والمطلوب منه ....
_اه والله ياخوي ,هيك بيجوز كان وضعنا ممكن يكون احسن ...
_وبيجوز كان الصهاينه هيك ما بيقدروا يلعبوا فينا فطبول زي اليوم ...

***
_طيب يارجّال , فرقه الموسيقى الفلسطينيه , مش يعني مهمتها تعزف , ومدفوع لكل واحد فيهم معاش بآخر الشهر مشان يقوم بمهمته بأفضل شكل ممكن ؟؟؟
_ أه , بس بيجوز الجماعه كانوا مشغولين ...
_ ومشغولين بإيش ياخوي ؟؟؟
مش همه ’’وجهنا الحضاري’’ قدام العالم والناس ....
_بيكونوا مثل اغلبيه هالموظفين الفلسطينيه , مشغولين يا خوي بالسياسه , وتاركين مهمتهم الأصليه, اللي بيقبضوا مشان إنجازها مصاري , لبعدين ....
_ والله يازلمه هذول لازم يسلموا على الدكتور عباس.....
_......؟؟؟!!!!!....
إستنى عندك شويه , انا اللي بيقول هالجمله , في النَصّ دايما , مش إنت !!!
_وأنا شو بقول ؟؟؟
_انت بتقول ....
مين هاذا الدكتور عباس ؟؟؟؟
_ بعدين بقوللك ....
_!!!!!!!!!!!!!!!!!!!!!!!!!!!!!!

سمعت الأخبار ؟؟؟ ـ الحلقه الخامسه ـ

25.06.2008

_سلامات ياعم ...
_هلا هلا ....
ما تقلليش سمعت الأخبار..؟ ..سمعتها ونص , والواحد يارجال , راسه بده يفقع مثل طنجره الضغط ,الله وكيلك ...
_ليش ياعم , ماهي الأمن مستتب زي ما صرح صيام وزير داخلينا ...
_هالله هالله يا امن !!! امن شو ياخوي ؟؟؟ امن الأموات والسجون والمخطوفين والجرايد المسكره والناس اللى خايفه من خيالها ...
_يارجال مالك ؟؟ مبين عليها فاقعه معك اليوم ...!!
_فاقعه ونص والله ,
يعني إنهم يستعملونا مشان يصيروا اٌمرا ووزا ,
قلنا , بهمش ,
ياظالم إلك يوم ....
بس كمان إنهم يستغبونا ويستعبطونا ..
.والله هاي مش داخله مخي وماني قادر اجمطها ...
_كيف يعني إستغبونا يارجال ؟؟؟....
_ لما صيام بعمل مؤتمر صحفي مبارح وبيقول فيه إنه الأمن والطمأنينه مستتبين , وإنهم قضوا على عصابات التهريب , وغيره من هالحكي الفاضي , هذا إسمه إستغباء للعباد وضحك على الذقون ....
_ليش يارجال , الله يسامحك , مزبوط إننا اليوم بنمشي بشوارع هاديه , ومش شايفين عصابات التهريب في الزواريب ....
_ شوف ياخوي , ماهو في اصغر ديكتاتوريه في هالعالم ,الأمن مستتب , وأتخن شنب ما بسترجي يرفع صوته , بس هالحكي ما بلغي إنه هذا امن أموات وكبت وقمع الحريات ...
إتطلع مثلا على كوريا الشماليه , ولا على الدول الإشتراكيه إيام زمان , ولا على التشيلي ايام بينوشه , ولا الإرجنتين تحت حكم الجنرالات , وقبلها اليونان ...
طيب ماهيه كانت عايشه بأمن ...
بس امن القمع والديكتاتوريه
امن إرهاب السلطه المسيطره على البلد..
وليش يعني نبعد كثير , شوف أغلبيه دولنا العربيه , ماهو الأمن فيها ياخوي مستتب ....
بس هاذا امن مفروض على رقاب العباد بحد السيف , وبقوه اجهزه المخابرات , وإرهابها ...
وهذا ’’امن نظام’’ فارض حاله بقوه السيف على روس الناس ...
_يا رجال زدتها شويه , حرام عليك ...
_ حرام عليه يارجال , ولا حرام على هالمتسلطين على البشر وفارضين حالهم بسلاح جماعاتهم المنتشره في كل محل ...
حرام عليه يارجال , ولا حرام عليهم إللي بمنعوا اي واحد معارض إلهم , او حتى مش متفق معهم , إنه يتنفس ...
وإذا تنفس ..راح بميت داهيه , بخطفوه وبنتهكوا حرمه بيته وبيروعوا ولاده وبيكسروا بيته , ولا بخطفوا اخوه او إبن عمه ...
حرام على مين يارجال ...
هو إنت مش شايفهم كل هالشباب مثل الورده ياللي ركبهم مهشمه وقاعدين في بيوتهم عاله على اهاليهم ؟؟؟
هو إنت مش شايفهم هالعصافيير الي تيتموا , والنسوان اللى ترملت مشان رجالهم قالوا كلمه حق وحاولوا يوقفوا قدام هالديكتاتوريه ....
ولا إنت يعني مش شايف هذول اللي بيفجروا محلات الأنترنت , وبيضايقوا على حياه الناس وحرياتهم ؟؟؟
_يارجال وحد الله , خفف صوتك شويه ...
_لا الله إلا الله , والله يا خوي راسي بده يفقع , قال امن قال ...
_بسيطه , هون عليك شويه ...
_ شوف ياخوي ...
في بولندا , ايام ما احتلها النازيه , كان في مدينه وارسوا حي يهودي , اجوا النازيه وبنوا حواليه جدران وحطوا سلاك شيك , ووقفوا على بوابه يمنعوا الناس من انها تخرج ولا تدخل , وبعدين منعوا عنهم الأكل والشرب ....
_يازلمه هاذا مثلنا هون ...
_تمام ...
وبعدين لما الناس ضَجّت , اجوا النازيين , شكلوا قوه بوليس من اليهود نفسهم , اعطوهم شويه مصاري وكم حبه سلاح , وقالوا لهم ’’ اظبطوا الأمن في الغيتوا , وخذوا من اهله اللي بدكم إياه ’’...
_يارجال هذا والله زي حالنا ...
_بالظبط ياخوي ...
وتصور انه صيام بده يقنعنا إنه إحنا عايشين بأمن وامان ؟؟؟
_طيب والتهريب , مش صح يعني إنهم قضوا عليه ؟؟؟
_ يارجال , صلي على النبي الكريم ...
_اللهم صلي وسلم عليه ...
_ لما بتكون كل الحدود مسكره ,
وما فيش عصابات تهريب ,
ومع هيك البلد ملانه دخان وإسطوانات ,
وشويه بضايع بتنباع بسعر الذهب ...
منين هاي جاي ياخوي ؟؟؟
_منيين؟؟؟
_همه ياخوي اللي بهربوها , وبيتاجروا فيها , وبربحوا عليها ثروات ....
_يعني بدك تقوللي إنهم ضربوا عصابات التهريب مشان يوخذوا محلهم ...
_الله وكيلك , ضربوا بعضهم , ونظموا عمل البقيه ....
_...في خدمه ’’ المقاومه المؤمنه’’؟؟؟؟ ...
_ايوه , هاي نفسها ’’المقاومه المؤمنه’’ اللي اليوم بتعمل على منع الشباب بإنهم يردوا على جريمه نابلس ....
_اي جريمه يارجال ؟؟؟
_هذول الصهاينه دخلوا مبارح بالليل على مبات طلاب جامعيين في نابلس , وقتلوا شباب ثنين بعمر الزهور , الله وكيلك حتى سلاح ما كان مع الشباب , وقتلوهم بدم بارد , واحد منهم كاين بشتغل مع الجهاد ....
_والقسام وينها ؟؟
, ما رايحه تنتقم لهم ؟؟؟
, ولو حتى كم صاروخ لرفع العتب ؟؟؟
_لا ياسيدي , قال ظبط نفس قال , مشان ننقذ الهدنه ..._صح ..الهدنه مهمه ...
_ياخوي ...
صحيح الهدنه مهمه ,
وصحيح إنه الرد مش لازم يكون رده فعل
,وصحيح إنه لازم الناس تنسق مع بعضها مشان ماحدا يجر الوطن كله وراه في معارك مش محسوبه ..
.بس ليش ياربي ,
مبارح لما كانت فتح تقول هالحكي ,
كانوا يقولوا عنها عميله , وبدها تحمي اليهود والإحتلال ؟؟؟
_يعني شو رأيك ,بكره بتوقع بين حماس والجهاد والشعبيه وفتح من جديد , وبتصير حماس هيه اللي بتمنعهم يضربوا صواريخ لإنها صارت اليوم ’’عبثيه’’ , بعد ما كانت مبارح ’’مقاومه شرعيه ’’؟؟؟
_والله ياخوي إذا الجماعه ما بستدركوا حالهم اليوم , بكره راح تصير حمايه اليهود ’’خدمه وطنيه ’’ , والمقاومه ’’خيانه شعبيه ’’ ....
_طيب كيف يعني بدك إياهم يستدركوا حالهم ؟؟؟
_لازم اول شئ يوقفوا عن إستغباءعباد الله ...
وبعدين يركضوا للأيد الممدوده إلهم من ابومازن ...
ويتفقوا على إنه مافيش إلا سلطه وحده بهالبلد , هيه اللي بتقرر الردود على كل جرايم ’’إسرائيل’’ , والجميع بيوقف وراها , وممنوع حدا يشتغل على راسه ويجيب المآسي للجميع بحجه ’’مقاومه’’ , او ’’هدنه’’ او ’’مفاوضات’’ ...
_وإذا صيام وجماعته فضلوا إمارتهم على مصلحه الشعب ؟؟؟
_يروحوا يا سيدي يشوفوا الدكتور عباس ؟؟؟
_مين......
_بعدين بحكيليك مين هو....

سمعت الأخبار اليوم ؟؟؟؟ ـ الحلقه الرابعه ـ

23.06.2008

_ان شاالله ما اتأخرت عليك ؟؟؟
_كلهم ابريقين شاي وساعتين نوم وبس , بسيطه ...

***


_ ياسيدي ... نرجع لموضوعنا ...
قلنا إنه بدا يدفع الفاتوره لصهاينه فرنسا و صار يشدد دايما على صداقته ل’’إسرائيل ’’ وإلتزامه امنها الإستراتيجي , وإدانه الإرهاب الفلسطيني , وبعدين قلنا إنه صار يشتغل على خلق ’’عقده ذنب ’’ عند الفرنسيين إتجاه ’’ اليهود ’’ ...
_ كيف يعني ؟؟؟
_اعطيك مثل صغير ....
في اول مناسبه , في الإجتماع السنوي ل’’مجلس الجمعيات الممثله للجاليه اليهوديه في فرنسا ’’ , راح يلقي فيهم خطبه , وبالمناسبه , هوه كان اول رئيس جمهوريه فرنسي بيروح لمثل هيك إجتماع ....
المهم , اخونا فقعهم خطبه من تحت الدست , ’’إسرائيل المسكينه والديمقراطيه واللى بتدافع عن حالها قدام الإرهاب , واللي بتسعى للسلام ’’ وغيره من هالحكي ,
وبعد هالديباجه الديماغوجيه , طلع عليهم بقرار رئاسي فاجئ فيه حتى جماعته ,
قال اخونا قرر يفرض على كل طفل فرنسي , من الصف الأول إبتدائي ,إنه يتوكل شخصيا بدوسيه شخصيه ,بالإسم والصوره , لطفل يهودي فرنسي تعذب ومات في وقت الحرب ...
_ معقول ..؟؟؟ ما هذول ولاد صغار ...يعني ما فكر شويه بأثر مثل هيك دوسيه على نفسيه هالعصافير الصغار ؟؟!!

_لأ ياخوي , قال هيك بده يزرع في نفس الفرنسيين من همه ولاد صغار كره ’’اللآساميه ’’ , وبده يقوي فيهم المناعه ضد ’’العنف اللآسامي ’’ والتفرقه العنصريه , وكل الأفكار المتطرفه ...
_منيح , بيجوز معه حق ياسيدي ....
_ لا ياخوي , ماهيهم الصهاينه ,بيقولوا إنهم بيعيشوا ليل نهار مع ذكرى المحرقه النازيه ’’على حكيهم ’’ , وهالحكي ما منعهم يكونوا نازيين معنا , ومتطرفين , وعنصريين , ولا منعهم من إرتكاب جرايم حرب , ومحرقه لشعبنا ...
هو إنت مش شايف حواليك كيف همه مسكرين علينا في سجن , وبجوّعونا إيمتى ما بدهم , وبعطونا شويه علف إيمتا ما بدهم ...
_اه والله ياخوي صايرين مثل الجاج الله وكيلك , بطعمونا قبل ما يصيدوا الي بدهم إياه منا , او بجوّعونا لما يزهقوا منا ...

***

_ 3 _

_طيب وغير هيك , شو كمان دفع إلهم ؟؟؟
_ شوف ياخوي ,
هاذي فرنسا , من يوم هالبطل الجنرال ديغول , كانت رافضه تحني ظهرها لأمريكا , ولا تدخل حلف الأطلسي , لإنه محطوط في خدمه سياسه امريكا ..
هاذا الجنرال كان يقول إنه هو مهتم بمصلحه فرنسا اللى لازم يكون إلها دايما صوت متميز , وصوتها هذا المتميز خلاها دايما توقف مع الحق العربي وضد الإحتلال الإسرائيلي ...
وتذكر معاي كيف ’’دومينيك دو فيلبان ’’ وقف في مجلس الأمن ضد قرار امريكا بتدمير العراق ...
اليوم اخونا ساركوزي , بإسم الصداقه الطبيعيه مع امريكا , ركع لبوش مثل بلير الإنجليزي , وحط فرنسا في حلف الأطلسي تحت قياده الأمريكان , ورضي يبعث جنود فرنسيين لجبهات المعارك في افغانستان , حتى إنه ’’آلان جوبه ’’ اللى كان رئيس وزرا في فتره سابقه تحت رئاسه شيراك , ولساته عضو قيادي كبير في الحزب الديغولي , إنتقد بشده قرارات ساركوزي , وإعترض على سياسه الإنبطاح لأمريكا اللي بمارسها أخونا ساركوزي ...
_يازلمه مالنا ومال حلف الأطلسي ..

***

...4...

_ طيب ماهو ساركوزي اول ما وصل مطار بن غوريون قال إنه لازم دوله فلسطينيه , وكمان قال إنه اللي بعملوه اليهود في القدس ما بخدم السلام ...
وكمان فرنسا بتعطي فلوس للسلطه ...
شو بدك احسن من هيك ...
_ والله ياخوي , هالأيام صايره كل الناس بتدعم ’’دوله فلسطينيه ’’ , حتى العبيط بوش بدعمها , وغيره وغيراته ,
بس ....
شو هي الدوله اللي هٌمه بحكوا عنها ؟؟؟
, وين حدودها ؟؟
شو سيادتها ؟؟
شو وضع القدس فيها ؟؟
شو بده يصير مع كل هالمعَتَرين من اللآجئين ؟؟
شو علاقه الضفه بغزه ؟؟
وغيره من الإسئله ...
كلهم بيقولوا , شوفوا مع الإسرائيليين وتفاهموا مع بعض ,
طيب الإسرائيليين ما بدهم يتفاهموا إلا على اللي بدهم إياه ,
وإحنا اليوم بوضعنا الحالي مش قادرين نفرض مصالحنا ,
والعرب صايرين قِلّتهٌم احسن من وجودهم ....
طيب شو ظل إذا دول العالم الكبيره ما بدها تضغط على اليهود ؟؟؟ ...
هاذا كله إسمه ذر رماد في العيون , وهروب من مسؤولياتهم , في تطبيق قرارات الأمم المتحده اللى صوّتوا لصالحها ....
_طيب وكل هالمصاري اللى بدفعوها...؟؟؟
_ ولك يا حبيبي هو من إيمتى الوطن بنشرى وبينباع بفلوس ؟؟؟
_ والله معاك حق....

***

...5...

_بس قوللي , معناته كل هالحكي اللى بحكيه اخونا ساركوزي , صاير بس عالفاضي ؟؟؟
_ لا والله مش عالفاضي , لسه أقطع بكثير من هيك ....
_ فهمني يا خوي ؟؟!
_ هاذا ساركوزي افندي حابب يقدم خدمه إضافيه لصاحبه , وكلامه اللى مثل العسل , ملان سَم ....
_ شو هالحكي يارجال ؟؟!
_زي ما بقول لك ....
شوف ...
الإسرائيليه بدهم تطبيع مع العرب بدون ما يحلوا مشكلتنا إحنا الفلسطينيين ...
_لهون وفهمانيين وموافقين , وبعدين ....
_ ساركوزي طلع علينا بفكره بتحقق حلم الصهاينه هذا ...
_زيدني كمان لأفهم !!!
_ الزلمه بيقترح تشكيل إتحاد دول حوض البحر الأبيض المتوسط ...
_يعني العرب والإسرائيليه مع بعضهم في إتحاد واحد ...
_ايوه ياسيدي ...
_يعني تطبيع مع ’’إسرائيل’’ بدون حل لمشكلتنا ...
_عليك نور ....
_يعني زي مشروع بوش ’’التحالف الشرق اوسطي للديمقراطيه ’’ , بس على اصغر ..
_شايف عاد يا سيدي ..
_ والحكي عن الدوله الفلسطينيه ؟؟؟
_ياسيدي هاذا غطا لعوره الدول العربيه اللى لسه في بوجهها شويه حيا وخجل , ومتردده تقبل مشروع اخونا ساركوزي ...
هيك بقولوا بكره , احنا بندعم مشروع ساركوزي لإنه ساركوزي بدعم الدوله الفلسطينيه ...
_ياسلام هالخبث يا عم !!!
_لا مش خبث يا صاحبي ... هاي بيقولوا عنها دهاليز السياسه ...

***

...6...

وأقلك كمان اكثر من هيك بشويه ؟؟؟
_هات , ما هو الواحد صاير بده دكتوراه علوم سياسيه , ويالا يالا يقدر يفكفك خيوط هاللعبه ...
_ يا سيدي , ساركوزي بكلماته المعسوله هاذي , راح يقنع ابو مازن إنه يدعم مشروع الإتحاد ...
_يعني يدعم التطبيع ...
_وهيك يا حبيبي , حتي الدول العربيه المتردده اكثر من غيرها , راح تلاقي , مش بس غطا , لحاف وأكثر ....
_وراح يقولوا ....
’’هو بدكم إيانا نكون فلسطينيه اكثر من الفلسطينيه ’’؟؟؟!!!
_عليك نور يا خوي ...هذول جماعتنا إذا قبلوا بهالحكي , والله لازم يسلموا همه الثانيين على الدكتور عباس ,لما يشوفوه ...
_يقطع حريشك يارجال ..ما تقوللي مين هو هالدكتور وتخلصني ...
_ اصبر يا خوي , مش أحنا بنقول ’’إن الله مع الصابرين ’’

23.06.2008

_ 1 _

_سلامات ياعم ...
_هلا بالمهلل ..
_ سمعت الأخبار لياوم ؟؟؟
_ لا والله ياخوي , َبستناك عشان تخبرني , ماانت صلير مثل إذاعه مونت كارلوا ...
_ عَشوا بدك نحكي , عن زياره نيكولا ساركوزي , ولا عن تصريح ابو مازن اللى بيقول فيه انه ما بده ’’دوله إسلاميه’’ في فلسطين ...
_ خلينا بساركوزي اليوم , والمره الجاي بنحكي عن طبيعه الدوله , ما إحنا شو ورانا , قاعدين وقاعدين الله وكيلك ....
_ يا سيدي , هذول بيقولوا انه الرئيس نيقولا ساركوزي مشرفنا هاليومين , وجاي زياره عند الصهاينه كثير , وخطفه رجل عِنّا ...
_ يا هلا , يا هلا , كمان واحد جاى يبيعنا حكي , ويوخذ منا مواقف ...!!
_ ليش هيك بتقول ؟؟؟ مين بيطلع هذا الساركوزي ؟؟؟
_ هذا ياسيدي رئيس فرنسا الجديد , وفرنسا هاليومين راح تكون رئيسه الإتحاد الأوروبي الدوريه للست اشهر الجاي ...
_ طيب كويس ,يعني زلمه بإيديه مفاتيح كثيره ...!!
_ صح , بس هاذا الزلمه , من يوم يومه ما بستعمل مفاتيحه إلا مشان حاله , ومشان يكبر بعيون حبابه , ويشبع حبه النارسيسيكي (النرجسي) لنفسه ....
_ شو هاذا ’’الناسيسيكي’’ يا رجال , إنت صاير ترطن زي الأجانب ...؟؟!!
_ هذا يا سيدي بيقولوا إنه في الزمانات كان رجال إسمه نارسيس , راح مره يشرب ميه من بحره , ولما شاف صورته بالميه , اعجب فيها كثير , وصار كل يوم يقضي ساعات وهو يتفرج في الميه على حاله , لحد ما سقط في البحره ومات غرق , ومحل ما مات طلعت زهره نرجس حلوه , ومن يومها صار الناس يحكوا عن اللى بموت بحاله , هذا زلمه نارسيسيكي , او نرجسي ....
_ ما تقول هيك من زمان , ماهو عنا كثير مثله . والله لو جمعناهم كان عملنا احلى ضٌمه نرجس في الدنيا , بس بيجوز ريحتها ما تكون عن جد عطره ...
.وبعدين شو يعني , ياسيدي خليه يحب حاله ...
_ المشكله ياخوي انه هذا الرجال , مشان يصل ويصير رئيس لفرنسا , إعتمد على اليهود الأكثر صهيونيه في بلاده , وفي حملته الإنتخابيه جيّروا كل قوتهم ونفوذهم الإعلامي والثقافي والسياسي والإقتصادي مشانه , وهوه حط مسؤول في حملته الإنتخابيه محامي يهودي إسمه ’’ارنو كارسفيلد ’’ كان راح تطوع مشان يخدم في الضفه ,جندي في الجيش الإسرائيلي , وكتب بعدين كتاب تباهى فيه بأنه شارك في ضرب فلسطينيه مشان يدافع عن ’’ إسرائيل ’’ ....

***
_ 2 _

_ طيب ياعم , ويعني شو إذا الصهاينه دعموا نارسيس ساركوزي ..؟؟؟
_ الله يقطع شرّك يارجال , إسمه نيقولا ساركوزي مش نارسيس ...
_ يا سيدي زي ما بدك , وبعدين ؟؟؟
_ وبعدين يا خوي زي قبلين ... كل شئ إله سعره , وبفاتورته ...
_ شو هاذي الفاتوره اللى طلبوها مِنه ..؟؟؟
_ اول شي يتخلى عن السياسه الفرنسيه التقليديه اللى كان الجنرال ديغول حطها , والقريبه من الحق العربي والفلسطيني , ومن بعده إتبعها كل الرؤساء الفرنسيين بما فيهم ميتران الإشتراكي ...
_وإتخلى ؟؟؟
_اه تخلى ونص , وصار كل ما يحكي عن الوضع هون يبدا بالتأكيد على العلاقات الإستراتيجيه مع دولتهم وإلتزامه بأمنها وامانها وإدانته كل عمل فلسطيني على اساس إنه إرهاب , والدفاع عن كل جرايم ’’إسرائيل’’ وكأنها مجرد دفاع عن النفس ...
_يعني مثل بوش ..؟؟؟
_والله وزياده شويه ...
_كيف ؟؟؟
_ هاذا الزلمه بيعمل على خلق عقده ذنب كبيره عند كل الفرنسيين إتجاه اليهود , بحجه انه كان في منهم , ايام احتلال المانيا لفرنسا , في الحرب العالميه الثانيه , جماعه الجنرال بيتان وحكومه فيشي اللي تعاملت مع النازيه , وساعدتهم بتجميع يهود فرنسا مشان يوخذوهم النازيين لمعسكرات الإعتقال في المانيا ...
_طيب ما هو فرنسا كان فيها كمان مقاومه عنيفه للنازيه قادها ديغول وشارك فيها الشيوعيين والتروتسكيين والإشتراكيين وغيرهم كثير, وبالنهايه دحروا النازيه والعملا , وحرروا بلادهم ( عقبال عنا ) ...
_هون المصيبه يارجال , الصهاينه وساركوزي معهم , بدهم يقنعوا الفرنسيين إنهم بتحملوا مسؤوليه عماله بيتان وفيشي , وبنسوا ديغول والمقاومه ...
_طيب كيف عمل ساركوزي مشان عقده الذنب هاذي ...
_ إشرب لك كاسه شاي يا خوي , هسه عندي شغله صغيره , وراجع إنشالله مشان نكمل موضوعنا ....
_ بستناك ....

سمعت الأخبار اليوم ؟؟؟؟ ـ الحلقه الثانيه ـ

20.06.2008

_عوافي ... _هلا ..هلا ...
_شفت الملتقى الفتحاوي اليوم ..؟؟
_لا والله , ليش بدي اشوفه , ماهاذا مٌلتقاهم ...
_ آه , بس فيه موضوع فٌرجه , بيشرح النفس , وبيبسط القلب ...
_هات سمعني لأشوف , شويه بسط ما بيضر بهالأيام المقيته ...
_هذول الجماعه شرشحوا بعضهم , بين جماعه فلان وعلتان ...
http://fatehforums.com/showthread.php?t=129041
_معقول ؟؟؟
_والله يارجال , ماخلّوا طابق مستور , كل شئ كتبوه اسود على ابيض , وهات إعرف السم من الدسم ....
_ياسلام !!! لهالدرجه ؟؟؟
_هذول بيقولوا عن هذلاك سرقوا وهربوا وتعاملوا مع امريكا , وهذلاك بيقولوا عن هذول قبضوا وإنبطحوا وغمضوا عيونهم عن دم إخوانهم ...
_شوقتني اسمع اكثر , هات لأشوف ....
_الله وكيلك , مثل الشحم على النار ...فضحوا بعضهم , وكل واحد بيجيب لك معلومات عن الثاني من تحت الدست , وبيقول عنها الحقيقه , والثاني بيكذبه , وبيجيب معلومات غيرها عن الثاني وبيقول عنها الحقيقه ....
_هذول صايرين مثل جماعتنا , كل واحد منهم بمتلك الحقيقه الإلآهيه نازله عليه لحاله من السما , وغيره غلطان , إما شارد او عميل ...
عجيب والله أمرهم !!! طيبب مش كلهم فتح ؟؟؟ وولاد نفس التنظيم ؟؟؟ وإلا انا غلطان ....
_لا والله ماإنت غلطان , بس ما سمعتش بالمثل اللى بيقول ’’ فرخ البط ...عوام ’’ ..
_ شو قصدك يا خوي ؟؟؟
_ يعني لما بتشوف معارك الكبار على صفحات الجرايد وشاشات التلفزيونات , من حكم بلعاوي لأبو على شاهين لأبو اللطف لعزام الاحمد لنصر يوسف وغيرهم غيرات , وهذول الله وكيلك وجه البٌكسه , كلهم مثل الشحم على النار, ونازلين ببعضهم دق من تحت الدست , مشان موقع في لجنه مركزيه ولا مشان وزاره ولا دفاع عن إماره ...
_ما تقللي هيك من زمان ...طبعا يا خوي , إذا كان الرجال اللى في موقع القياده , بيعملوا في بعضهم هيك , وبيفضلوا احيانا مصلحتهم الشخصيه على مصلحه تنظيمهم , كيف يعني بِدّك الكوادر الصغار يكونوا ؟؟؟...
_ خليهم الله لا يردهم , فخار بيكسر بعضه ...
_بس قوللي ؟؟؟
... طيب مش عندهم مجلس ثوري بيجتمع من وقت لوقت , وجماعه هذول وهذلاك موجودين بجنب بعض في رام الله , وكمان فوق كل هالحكي عندهم مؤتمر حركه عام جاي بعد كم شهر , ليش ياخي ما يصفوا قلوبهم بين بعضهم في إجتماعاتهم , مش بيقولوا انه مصلحه فتح بتهمهم ؟؟؟
_صح هيك بيقولوا ...!!...
_طيب يعني , كل هالفضايح المزعومه , بتفيد فتح بشي , وإلا ياربي بتخدمنا إحنا خصومهم ؟؟؟
طيب ما إحنا بكره راح نستعمل معلوماتهم ضدهم , وراح نضربهم بنفس الصواريخ اللى بضربوا بعضهم فيها ....
_ لا يا سيدي , ما حدا منهم بيفكر في هيك حكي , بيقولوا هاي ديمقراطيه وحريه رأي !!!!
_من إيمتى يعني كانت الديمقراطيه مسبات وفضايح , ولا حريه الرأي شرشحه ورطن على الفاضي بدون إحترام لحدا ؟؟؟؟
_يارجال خليهم , جماعتنا هيك مبسوطين منهم وعليهم ....
_مزبوط , يعني بكره إذا دق الكوز بالجره , بنقول ’’كيف مصدقين إنهم بيسعوا لوحده الشعب وهمه مش قادرين يتفاهموا مع بعضهم , ونازلين ببعضهم سلخ مشان مصلحه هذا الزلمه ولا هذاك ...
_والله معك حق ....
_اقلك شي ؟؟؟
_هات ..
_هذول والله في منهم جماعه لازم ضروري يسلموا كثير على الدكتور عباس لما بيشوفوه ....
_ولك ياإبن الحلال , مين هو هالدكتور اللي طاوشني فيه ؟؟؟؟
_على مهلك , ما تستعجلش , بعدين بقول لك مين هو .....